О.Осоржамаа дээрэмчдэд зодуулж, эрүүл мэндийн үзлэгт оржээ
Шорлог зарж амьдралаа залгуулж явсан хүүг цахим орчинд “алдаршуулж”, улмаар утгаа алдтал нь “давруулсан” зүйл бол лайв /live/ бичлэг юм.
Төрсөн эх нь орхиж явснаар айл айлын хаяа бараадаж өссөн гэх өрөвдмөөр түүхтэй өнчин хүү сайхан сэтгэл хүмүүсийн ачаар хүсч мөрөөддөг урлагийн сургуульдаа орж, иж бүрэн таван ханатай гэр бэлгэнд авсан нь саяхан. Гэвч тэр олны итгэл, хайрыг хараахан дааж чадаагүй нь үнэн.
Орсон сургуульдаа ч суралцаж чадалгүй хасагдаж, авсан гэрээ голоод байртай болохыг хүсч, олон түмнээс эрээ цээргүй мөнгө нэхэж эхэлсэн. Сүүлдээ бүр эмэгтэй хүн шиг хувцаслаж, эр нөхөрт гарахыг мөрөөдөв.
Лайв хийх бүртээ мөнгө гуйж, дансны дугаараа хэлэх зуршилтай болсон түүнээс хүмүүс залхсан ч, цахим хандалтын тоо нь одоо ч буураагүй хэвээр.
Гадаа гудамжинд, цагдаагийн хэлтэс дээр ч шоолуулж, зодуулж, гудамшигт байдалд үргэлж ордгоо нуугаагүй О.Осоржамаа хоёр хоногийн өмнө дээрэмчдэд зодуулсан гээд ахиад л мөнгө гуйлаа. Түүгээр ч зогсохгүй, хөх няц болсон нүүр царайгаа ч эдгээж амжилгүй эрүүл мэндийн иж бүрэн үзлэгт ороод авч. Гэвч түүнд одоо итгэж, түүнийг өрөвдөж мөнгө өгөх хүн хэр олон байх юм бол доо…
