Асашёорюү Д.Дагвадорж загас идэж, цадаж явна
Мэргэжлийн сумогийн 68 дахь их аварга асашёорюү Д.Дагвадорж өдгөө эх орноо тойрон загасчилж яваа ажээ. Энэ тухайгаа өөрийн цахим хуудаснаа “Монголын далайд загасчилсан нь” хэмээн гэрэл зургуудаа оруулсан байна.
Түүний хувьд одоогоос 5-6 жилийн өмнө “Монголын тул загас маш ихээр ховордож байгаа. Тиймээс тул загасаа хайрлах, үржүүлэх клуб байгуулбал ямар вэ” хэмээн олон нийтийг уриалж, өөрөө ажиллаж эхэлсэн удаатай. Цаашдаа Халх голын цутгал дээр загас үржүүлгийн газар байгуулах, Хархорины Орхон голын эрэг дэх жижиг салааг цөөрөм болгох зэргээр олон ажил төлөвлөөд байсан юм.
Их аваргын хувьд Японы Хоккайдо мужийн Хорокано тосгонд тул загас үржүүлэх, гар аргаар эвцэлдүүлэх ажилд оролцон, суралцсан гэдэг.
Ямартаа ч, түүний хобби загас хамгаалах хүслийг нь ялан дийлж, загасаар гэдсээ цатгаж яваа бололтой.
