Өмнөговь аймгийн малчид зүдрүүхэн байна
Ургамал ногоо, айраг цагаа тэгширсэн зуны адаг, намрын сүүл саруудад зарим аймаг орон нутагт хур бороо ороогүйн улмаас малын хамар хатгах өвсгүй, улаан гантай байна.
Тухайлбал, Өмнөговь аймгийн хойд хөндийгөөр Булган сумын малчдын 90 гаруй хувь нь отор нүүдэл хийх болжээ. Бороо орохгүй, газар ногоогүй цаг хүндэрсэн тул Ханхонгор, Цогтцэций сумдын нутаг чиглэсэн их нүүдэл үргэлжилж байна.
Эх сурвалжийн мэдээллээр Булган сумын малчдын зарим нь нутгаасаа гараад сар гаруй хонож байгаа бөгөөд өдөржин шөнөжин малаа эргүүлж тойрсоор ядруухан байдалтай байгаа аж.
Отрын айлуудыг зэргэлдээх сумын зарим хүмүүс хөөж туудаг, худаг усаа өгдөггүй зэрэг асуудлууд тулгарч эхэлсэн байна. Малын тамир тэнхээ муу байгаагаас нүүдлийн ая даахгүй энд тэнд хэвтэж хоцорсон төл мал, унага байх нь сэтгэл эмзэглэмээр дүр зурагтай байгааг эх сурвалж онцолж байлаа.
Тиймээс Өмнөговь аймаг болон хөрш зэргэлдээ сумдын удирдлага яаралтай арга хэмжээ авч отрын малчдын бэлчээр усны асуудлыг яаралтай шийдвэрлэх шаардлагатай байгаа юм. Түүнчлэн ган гачигтай зарим орон нутгийг Улсын онцгой комисс анхааралдаа авч холбогдох хүмүүст үүрэг чиглэл өгөх, отрын малчдад малын өвс тэжээлийн асуудалд анхаарлаа хандуулах хэрэгцээ шаардлага тулгараад байна.
