Сураг алдсан оддын эрэлд-Anemone хамтлаг
25-р суваг телевизийн “Making The Band” реалити шоу нэвтрүүлгээс төрөн гарсан хамгийн анхны хамтлаг бол “Anemone” хамтлаг. Хамгийн эхэнд гарсан ч хамгийн удаан оршин тогтносон гэж болох тус хамтлаг албан ёсоор тарсан. Харин тус хамтлагийн гишүүн байсан охид өдгөө хаана юу хийж явна вэ.
Өвөрмонголд дуулах болсон Ооноо
Хамтлагийн охидоос хамгийн түрүүнд Япон улсад суралцахаар болж хамтлагаа орхисон Ооноо буюу Т.Оюунтуяа үзэгчдийн хамгийн хайртай гишүүн байсан гэхэд хилсдэхгүй. Үүнээс хойш сураг тасарсан түүнийг өдгөө Өвөр Монголд уран бүтээлээ үргэлжлүүлэн хийж буй сурагтай. Өдгөө 31 настай Ооноо бүсгүй Япон улсаас гэр бүлийн хамтаар ирсэн. Түүний охин хэдийнээ долоон нас хүрсэн бөгөөд ээжтэйгээ усны дусал мэт ижилхэн гэсэн.
Ооноо “Making The Band” шоунд оролцохоосоо өмнө “TV8” телевизээс зохион байгуулсан “Monster” амьд хөгжмийн шоунд амжилттай оролцож байсан туршлагатай нэгэн аж. Харин 2011 онд хамтлагт орж 2012 онд гарсан тэрээр үүнээс хойш нам гүмхэн амьдрах болсон.
Иогчин Жульдыз
Хамтлагийнхаа хамгийн хөөрхөн, хамгийн насаар бага гэгддэг Жулиа буюу Жульдыз өдгөө иогчин болжээ. Тэрээр дөнгөж ЕБС-ийн сурагч байхдаа тус хамтлагт сонгогдон үлдэж байсан. Өдгөө 26 настай Жульдыз хамтлагаа тарсны дараа Жаннатай нийлж “JJ” хэмээх хамтлаг байгуулан өрх тусгаарласан ч хол яваагүй. Харин хэд хэдэн уран сайхны кино, рекламд тоглож амжсан. Нэг хэсэг реппэр Амараатай романс үүсгэж олноо ил гарч байсан Жулиа өдгөө ганц бие. Түүнийг эргүүлдэг залуус олон байдаг бөгөөд тэдний дунд А.Сүхбат аварга, УИХ-ын гишүүн асан Мөнх-Оргил нарын нэр цохиж явдаг.
Voice-оос хусагдсан Жанна
Хамтлагийнхаа хамгийн хүчтэй хоолойтой дуучин гэгддэг Жанна буюу Баяржаргал тун сэргэлэн бүсгүй. Тэрээр “Making The Band” шоунаас хойш Жульдызтай үй зайгүй нөхөрлөх болсон бөгөөд хаа ч явсан хамтдаа. Тэднийг хайр дурлалаа нөхөрлөлөөр сольсон гэх яриа ч байдаг. Тэрээр 2018 онд Voice of Mongolia шоунд Төрийн соёрхолт дуучин Д.Болдын багт шалгарсан ч, battle шатанд дуучин Насанбуянд ялагдсан байдаг. Жанна өдгөө 28 настай, мөн л иогт үнэн сэтгэлээсээ дурлан хичээллэх болжээ.
Үерхэлээ гэр бүл болгосон А.Халиун
Anemone анх байгуулагдахад ганцаараа найз залуутай гэдгээ бардам хэлж байсан хамтлагийн гишүүн бол Халиун. Хамтлагийн охидоосоо хоолойны темпээрээ ялгардаг тэрээр өнгөрсөн 2019 онд анхны хүүхдээ өлгийджээ. Түүний гэр бүлийн хүнийг Төгөлдөр гэдэг бөгөөд урлагт хайртай, амьд хөгжмийн хамтлагтай байсан ажээ. Anemone хамтлагаас Жанна Жулиа хоёр өрх тусгаарлах үед Халиун,Цэнгэлэн нар бууриа сахиж үлдсэн ч удалгүй хамтлагаа тарснаа албан ёсоор зарласан.
Сайн ээж, артист Б.Цэнгэлэн
Хамтлагийнхаа хамгийн даруухан инээмсэглэлтэй гэгддэг Б.Цэнгэлэн гэр бүл зохиогоод хэдэн жилийн нүүр үзэж буй. Хоёр настай хөөрхөн хүүтэй тэрээр үеийнхэндээ үлгэр дууриалал үзүүлдэг сайн ээж гэдэг юм билээ. Б.Цэнгэлэн хамтлаг тарснаас хойш нэг хэсэг соло уран бүтээл хийх гэж оролдоод бүтэлгүйтсэн. Үсээрээ тоглох шиг болдог тэрээр өөрийн гэсэн өвөрмөц сэтгэлгээтэй гэдэг нь өмссөн зүүснээс нь харагддаг.
