Орхон аймгийн Засаг даргын ээлжит шуурхай хуралдаан хуралдаж хуралдааныг аймгийн Засаг даргын орлогч С.Батжаргал, А.Түвшинжаргал нар удирдан явууллаа. Шуурхай хуралдаанд зарим алба хэлтсийн дарга нар мэдээлэл хийлээ.
ЦЕГ-ын даргын 2020 оны 864-р тушаалаар Орхон аймгийн Цагдаагийн газрын даргаар Цагдаагийн хурандаа С.Цэрэнсамбууг томилжээ. Цагдаагийн хурандаа С.Цэрэнсамбуу нь 1997 онд Цагдаагийн дээд сургуулийг эрх зүйч мэргэжлээр төгссөн. Хууль зүйн ухааны магистр зэрэгтэй. Ажлын гараагаа Сүхбаатар дүүргийн хорооны цагдаагаас эхлүүлж 1997-1998 онд Архангай аймгийн ЦГ-т Хэсгийн төлөөлөгч, 1998-2003 онд Сүхбаатар дүүргийн Цагдаагийн хэлтэст эрүүгийн төлөөлөгч, ахлах төлөөлөгч, 2003-2007 онд Эрүүгийн цагдаагийн газарт ахлах төлөөлөгч, 2007-2008 онд Сонгино хайрхан дүүргийн Цагдаагийн хэлтсийн мөрдөн байцаах тасагт Хэлтсийн дарга, 2008-2009 онд Эрүүгийн цагдаагийн газарт ахлах төлөөлөгч, 2009-2012 онд Архангай аймгийн ЦГ-ын дэд дарга бөгөөд Эрүүгийн цагдаагийн тасгийн дарга, 2012-2016 онд Ховд аймгийн Цагдаагийн газрын дарга, 2016-2020 онд Завхан аймгийн Цагдаагийн газрын даргаар ажиллаж байжээ.
Өвөлжилтийн бэлтгэл ажлыг хангах ажлын хүрээнд халтиргаа гулгаанаас сэргийлэх зорилгоор 20 тн давс, 13 тн цас хайлуулах бодис нөөцлөөд байна. 25-26нд шилжих шөнө орсон цасны халтиргаа гулгаанаас сэргийлж 1,2 тонн давс, 0,9тн бодис цацжээ.
Хотын доторх нийтийн эзэмшлийн зам талбайн гэрэлтүүлгийн асалтын хуваарийг орой 18:00- 07:00 цаг, гэр хорооллын гудамж хоорондын гэрэлтүүлгийг орой 18:00- 02:00 цаг хүртэл, өглөө 05:00-07:00 цагийн хооронд асаах өвлийн цагийн хуваарьт шилжүүлжээ.
Шуурхай хуралдааны төгсгөлд өвөлжилтийн бэлтгэлийг сайтар хангаж, 2021 оны хөрөнгө оруулалтын ажлын явцад хяналт тавьж, анхаарч ажиллахыг холбогдох албаныханд анхаарууллаа.
Түүнчлэн ил гарсан цахилгааны утас, явган замын хайс, үзүүртэй төмөр, траншейны таг, ухсан нүх гэх мэт үүсч болзошгүй нөхцөл байдал, гарч болзошгүй аюул ослоос урьдчилан сэргийлэх зорилгоор иргэд эрсдэлд зүйлүүдийг харсан даруйдаа төрийн байгууллагад мэдээлдэг байх нөхцөлөөр хангаж өгөх боломжийг бүрдүүлэн ажиллах талаар үүрэг өгөгдлөө.
Мэдээллийн төв
