Өчигдөр 15: 40 минутын орчимд Төрийн ордны зүүн жигүүрын хоёр давхарт ажилладаг ажилтнаас короновирус илэрсэн гэх мэдээлэл гарсан. Уг асуудалтай холбогдуулан тус жигүүрт хөл хорио тогтоож гишүүдийн автомашиныг ордны хашаа руу нэвтрүүлэхгүй байв.
Ер нь бол ордон хавиар ажилладаг хэн хүнгүй айдас түгшүүрийн байдалтай байгаагаа өөрсдөө сошиалаар мэдээлж байсан.
Гэтэл тус сэжигтэй тохиолдлын PRC шинжилгээ хариу хоёрхон цагийн дотор гарч, сөрөг гэх мэдээллийг ХӨСҮТ-ийн дарга Нямхүү өгсөн.
Угтаа энгийн иргэдэд хийсэн шинжилгээний хариу 72 цагийн дотор гардаг бол Төрийн ордны ажилтны шинжилгээний хариу 2-хон цагийн дотор гарах жишээний.
Энгийн иргэд орон нутгаас нийслэл рүү орж ирэхийн тулд дөн өвлийн хар хүйтэнд нялх нойтон хүүхэдтэйгээ, өндөр настай аав ээжтэйгээ, өнөө маргаашгүй төрөх дөхсөн эхнэртэйгээ энүүхэн хаяанд буюу Эмээлт дээр хэдэн хоногийг хоолтой хоолгүй, нойртой нойргүй, авто машинаасаа ч буух эрхгүй 1-3 хоногийг өнгөрүүлж буй. Төр засгийн энгийн иргэдээ ялгаварласан байдлаас болж жирэмсэн эх Эмээлтийн товчоон дээр амиа алдлаа. Эцсийн эцэст талийгаачийг амь тэмцэж байхад УОК-ын шийдвэр нэрийн дор нүдэн дээрээ үхүүлсэн хоёр цагдаа, нэг эмчийг яллахаар байцааж эхэлсэн гэх. Энэ иргэний үхэлд хамгийн гол буруутан нь эмч, цагдаа нар биш түүний ард байгаа УОК-ийнхон.
Бид короновирусын хөл хорионы үед хэдэн иргэнээ өвчнөөр биш үүсч буй нөхцөл байдлаас болж амиа алдсан иргэдийн тоог сийрүүлэн бичье.
Техникийн спиртэд хордож-4
Гадаадад гацаж эх орондоо ирэх замдаа онгоцонд-1
Гадаадаас иргээд 21 хоногийн тусгаарлалтад байхдаа-2
Эмээлт товчоон дээр ирээд эмнэлгийн тусламж авч чадаагүй-1
Самранд яваад гэртээ харьж чадалгүй осгож нас барсан-2
Хөл хориотой уралдан нийслэл рүү ирж яваад усанд живсэн-2
Гэтэл короновирусээр амиа алдсан хүн ганц ч үгүй. Ингээд бодоход гурван сая иргэн бид УОК-ийн утгаггүй шийдвэр, иргэддээ цаг хугацааны хувьд ялгавартай ханддаг шинжилгээний хариу, хөл хорио, айдас түгшүүрээс болж цөөн цөөнөөрөө нөгөө ертөнцийг зорьсоор л байх уу гэдэг асуулт гарч ирж байна.
