МУГЖ дуучин С.Жавхлан сүүлийн жилүүдэд улс төрөөр өвчилж, 2016-2020 оны УИХ-д бие даан нэр дэвшснээр төр түшилцэж явсан. Сайн муугаараа хэлүүлэн байж УИХ-д суусан дурсамжаа дуучин залуу маань бусдад ярих дуртай.
Өнгөрсөн сонгуулиар төрлөх Увс аймагтаа очиж, дахин УИХ-ын гишүүний суудал горилсон боловч өвдөг шороодсон. Нутгийнхандаа шарлахсан дуучин залуу маань “Миний дууг битгий сонсоорой, дахин энэ нутагт чинь ирэхгүй” хэмээн нутгийн олондоо туниж байсан цаг саяхан.
Тэрээр Архангай аймгаас гаралтай дуучин Г.Эрдэнэчимэг бүсгүйтэй хоёр дахь амьдралаа холбож, дөрвөн хүүхдийн эцэг болсон. Дуучин С.Жавхланг улс төрийн сонгуульд өвдөг шороодоод, уйлж дуулан доглон нулимстай ирэхэд хадмын талынхан нь “өмөлзөж” угтаж байсан бичлэг сошиалаар нэг цацагдаж байв.
Тэгвэл гавъяатын маань хадам ээж төрийн дээд шагнал “Алтангадас” одонгоор энгэрээ мялаажээ. Энэ тухай С.Жавхлангийн гэргий Г.Эрдэнэчимэг цахим хуудаснаа нийтлэсэн байна.
