Монголын хөгжмийн урлагт тод мөрөө үлдээж, ард түмний дуулах дуртай олон сайхан дуу зохиосон, хөгжмийн зохиолч Товуугийн Насанбуян юм. Эгэл жирийн ажилчин явсан түүнийг их урлагт хөтөлж оруулсан багш нь Монгол Улсын Хөдөлмөрийн баатар, Ардын жүжигчин Г.Хайдав юм.
Тэрбээр зөвхөн дууны хөгжим зохиогч бус, мөн найрал дууны урлагийг мэргэжлийн түвшинд хөгжүүлэхийн төлөө нэгэн насныхаа амьдралыг давхар зориулсан нэртэй уран бүтээлч билээ. Хөгжмийн зохиолч Т.Насанбуян уран бүтээлээ туурвисан 60-аад жилийн хугацаанд 1000 орчим дуу, оратори буюу магтуу, романс, хүүхдийн дуу гээд л уран бүтээлийн баялаг сан хөмрөгтэй хөгжмийн зохиолч болсон ч хөрөнгө, санхүүгийн боломжоос шалтгаалж нэг удаа ч болов уран бүтээлийн цэнгүүнээ ард түмэндээ толилуулаагүй нь нэн харамсалтай.
“Мичид шүргэх Алтай”, “Сансрын уудамд монгол хүү цойлон гарлаа”, “Сансрын баатар Жүгдэрдэмидийн Гүррагчаа”, “Нисгэгчийн гэргийн дуу”, “Юрий Гагарин”, “Монгол нисгэгчид” зэрэг дийлэнхдээ тэнгэр, сансар огторгуйг магтан дуулсан аялгуу төгөлдөр сайхан дуу зохиосон, хөгжмийн зохиолч Т.Насанбуянг уран бүтээлч нөхөд нь “Тэнгэр заяатай хүмүүн” гэж нэрлэдэг нь дэмий ч нэг хэлсэн үг биш байх аа.
Тэнгэрийн суудалтай хөгжмийн зохиолч тэнгэртээ заларчээ. Ар гэрийнхэнд нь гүн эмгэнэл илэрхийлье.
