Монголын “Сүлд модны наадмын дуу” нь 1959 онд зохиогджээ. Төрийн шагналт хөгжмийн зохиолч С.Гончигсумлаагийн хөгжим, Соёлын гавъяат зүтгэлтэн, яруу найрагч Ж.Бадраагийн шүлгээр бүтсэн уг дуу зохиогдсоноос хойш 61 жил дараалан эгшиглэсээр байна.
“Цалин мөнгөн тэнгэртээ цасан угалз наадуулсан, Цагаан торгон өмсгөлдөө цацаг чимгээ сагсуулсан…” хэмээх энэ түүхэн дууг 1962 онд МУ-ын Ардын жүжигчин Б.Зангад дуулж Монголын радиогийн алтан сан хөмрөгт бичүүлжээ.
Түүний дараа Төрийн шагналт, нэрт хөгжмийн зохиолч С.Гончигсумлаа агсаны мэндэлсний 100 жилийн ойгоор Дуучин Д. Хишигбаяр, Р.Дэлгэрмаа нар анхлан дуулсан МУ-ын Ардын жүжигчин Б.Зангадтай хамтран шинэчлэн дуулжээ.
“Сүлд модны наадам” дуу”-г хамгийн сүүлд Дуурийн гоцлол дуучин Ө.Уянга симфони оркестортой дуулан хүргэжээ.
Зохиогдсоноосоо хойш нэгэн жаран дамжин баяр бүрт эгшиглэсээр байгаа “Сүлд модны наадам” дуу”-г дээрх уран бүтээлчид өөр өөрсдийн өнгө төрх, мэдрэмжээрээ амилуулжээ. Хэн нь илүү амилуулсныг та бүхэн дор бүрнээ тунгаах биз ээ.
Б.Мөнхжаргал
