Орхон аймгийн боловсролын газрын дарга О.Ариунгэрэлт гэгч ажилчдаа удаа дараа зодож, ёс зүйн алдаа гаргадаг талаар тус байгууллагынхан хууль хяналтын байгууллагад хандан өргөдөл гаргаад байгаа аж.
Тухайлбал, О.Ариунгэрэлт дарга нь тус байгууллагын хүүхдийн хөгжил, хамгаалал, тэгш хамруулах боловсрол хариуцсан ахлах арга зүйч М.Сэлэнгэ гэх эмэгтэйг хоёр ч удаа зодож танхайрсан байна. Хамгийн сүүлд 2025.06.28-ны өдөр Өмнөговь аймгийн үдэлтийн хаалган дээр тус байгууллагынхан хоорондоо маргалдаж зодолдсон байна. Энэ үеэр О.Ариунгэрэлт дарга уг зодооныг салгах гэж байсан М.Сэлэнгэ гэх бүсгүйг үсдэж, алгадаж зодож, газар унагаасан байна. Үүний дараа тэрбээр Орхон аймгийн Боловсролын газрын гадаад хэлний арга зүйч н.Даваахүү, цахим хариуцсан арга зүйч н.Болортуяа нарыг мөн зодож танхайрчээ.
Улмаар уг хэргийн талаар тус байгууллагынхан хуулийн байгууллагад хандахад О.Ариунгэрэлт дарга нь бусдаар өргөдлөө татчих хэмээн уучлалт гуйж бэлэг бэлт өгөхийг завдсан байна.
Хэргийг өдгөө Орхон аймгийн цагдаагийн газраас шалгаж байгаа бөгөөд мөрдөн байцаалтын ажиллагаа хийгдэж байгаа тул дэлгэрэнгүй мэдээлэл өгөх боломжгүй байна гэв.
Бид энэ хэргийн талаар эргэж мэдээлэх болно.
