“Дуу төрсөн түүх” булангийнхаа энэ удаагийн дугаарт Б.Ангирмаагийн “Чиний харцанд” дууны түүхийг онцоллоо. Анх 2000 оны үед хит болж байсан энэ дууг одоо ч хүмүүс сонсох дуртай.Харин энэ бүтээлийг эзэнтэй гэдгийг төдийлөн мэддэггүй.
Тэгвэл дуучин маань дууныхаа тухай ийнхүү ярьсан юм.
-“Чиний харцанд” дуу хэрхэн бүтсэн бэ?
-Анхны бас хайртай бүтээлийн минь нэг нь “Чиний харцанд” дуу. Сэтгэлийг минь олон өдөр чилээж, шаналгасны дараа бүтсэн гэж санагддаг юм. 2000 оны үед залуусын дуулах дуртай дууны нэг байлаа.
–Эзэнтэй дуу гэж сонссон. Хэнд зориулсан юм бэ?
-Миний бүтээлийн тодорхой хувь нь эзэнтэй байдаг. Зүгээр сууж байхад аялгуу төрнө гэдэг хэцүү. Ямарваа зүйл сэтгэлийг минь хөдөлгөж, би түүнийг мэдэрч байж дараа нь бүтээлээ хийдэг. Ингэж бүтсэн дуунууд удаан настай байх шүү. Түүнтэй адилхан.
–Таны анхны хайр байв уу?
-Эргээд бодоход анхны хайр байсан юм билээ. Тэр хүнийг хайрласан нандин сэтгэлээс төрсөн дуу. Тухайн үед өөрөө дуулсан учраас илүү амьд, хүнд [ хүрсэн байх гэж боддог. v Дуулахад зүрх хүчтэй цохилоод, догдолдог байсан.
–Дууны тань эзэн өөрт нь зориулсан гэдгийг мэддэг болов уу?
-Мэддэг байх. Нэг хэсэг радио суваг солих бүрт явдаг байсан. Одоо бодоход сайхан санагдаж байна. Сүүлд манай “Киви”-ийн охид сэргээж дуулсан шүү дээ.
Эх сурвалж: Хөгжмийн зохиолч Б.Ангирмаа
Дуучин Б.Ангирмаа, Л.Тайванбат “Чиний харцанд”
Дуучин Б.Ангирмаа, Л.Тайванбат, Камертон хамтлаг “Чиний харцанд”
“Киви” хамтлаг “Чиний харцанд”
