Монголын орчин үеийн хөгжмийн урлаг, рок поп хөгжмийн сэргэн мандалтыг тунхагласан “Хөх тэнгэр” “Шигтгээ” “Элькондор” хамтлагийн дуучин, хөгжимчин Болдын Цог урлагт 30 жил тасралтгүй хүчин зүтгэж, кино, дэлгэцийн талбарт ч уран бүтээлээ туурвисаар байна. “Жирийн монгол охин” “Агшин” “Хүүхэд нас“ “Охин минь дээ” “Бүсгүй минь” зэрэг сэтгэлд хоногшсон дуунуудын эзэн дуучин, хөгжимчин Б.Цог хорт хавдар өвчинтэй тэмцэж, яаралтай элэг шилжүүлэн суулгах хагалгаанд орох шаардлагатай болсон талаар бид мэдээлсэн.
Тэгвэл түүний хагалгаа амжилттай болсон байна. Энэ талаар түүний эхнэр “Ханийн минь хагалгаа амжилттай боллоо. Бидний төлөө сэтгэл зүрх өглөгийн буянаа харамгүй хайрласан бүх хүнд талархаад баршгүй ээ. Та нарынхаа энэ их сэтгэлийн буянаар хань минь удахгүй эдгэнэ гэдэгт эргэлзэхгүй байна. УНТЭ-эрхтэн шилжүүлэн суулгах төвийн Төрийн соёрхолт,МУ-ын Хүний гавъяат эмч, АШУ-ны доктор, профессор МУ-ын зөвлөх эмч О.Сэргэлэн ахлагчтай алтан гартай эмч сувилагч нартаа,цаг тутамд гэр бүлийн минь төлөө миний төлөө санаа тавьж тусалж дэмжиж хажуунаас минь хана хэрэм мэт тулж түшиж байдаг гэр бүл минь болсон МУУГЗ Хөгжмийн зохиолч Л.Балхжав захиралтай хайртай хамт олондоо, “Бид нэгэн гэр бүл”-ийн бие биенийхээ төлөө гэсэн халуун дулаан сэтгэл зүрхтэй рок попийн авъяаслаг сайхан уран бүтээлчид, хамаатан садангууд ах эгч, дүү нартаа аав ээжийн минь найз нөхөд, ханийн минь аав ээжийн найзууд, төрөл садангууд, ханийн минь 10 жил,их дээд сургуулийн ангийн хамт олон найз нөхөд, миний ангийн 10 жил,их дээд сургуулийн хамт олон найз нөхөд, хүүгийн минь ангийн хамт олон ээж аавууд, найзууд та нартаа бүх л хүмүүст маш их баярлалаа. Түмэн олны далай их хайр буян гэж үнэхээр агуу юм ханийн минь төлөө халуун гараа сунгаж сэтгэлийн дэм хайрласан эрхэм сайхан сэтгэлт буянтнууддаа Чин Сэтгэлийн Талархал илэрхийлье.
Та бүхний маань ажил үйлс үргэлж өөдөө дэвшин өөдөлж байх болтугай, Буян тань Бум Түм болон аривжигээ гэсэн сайхан ерөөл өргөе. Маш их баярлалаа
Та бүхнийг гүнээ хүндэтгэсэн Б.Цогийн гэр бүл” хэмээн мэдэгджээ.
Удахгүй брэн тэнхэрч олон сайхан уран бүтээлээр эргэн уулзаарай Б.Цогоо. Эрүүл энхийг хүсье.
