Хөл хориотой холбоотойгоор гааль дээр буух автомашины тоо эрс цөөрч, улмаар автомашины үнэ 500 мянгаас хоёр сая төгрөгөөр үнэ нь нэмэгджээ.
Хэрэглэгчдийн хамгийн их худалдан авдаг автомашины тоонд зүй ёсоор орох болсон тоёото приус 20 нь 13-14.5 сая төгрөг, тоёота приус 30 нь 19-21 сая төгрөгийн үнээр худалдаалагдаж байна. Ихэнх автомашины шилэн дээр үйлдэрлэсэн он, хөдөлгүүрийн хүч чадал, зарж буй хүнийх нь утасны дугаар, автомашины онцлогийг тусгайлан бичиж наасан байна.
Хэрэглэгч автомашиныг банк болон банк бус санхүүгийн байгууллагын лизингээр аль эсвэл шууд бэлэн мөнгө төлөөд худалдан авч болно. Бэлэн мөнгөөр худалдан авалт хийвэл хэн хэндээ л хожоотой наймаа болох шинжтэй. Үндсэн үнээсээ дунджаар 300-500 мянган төгрөг лав буулгах гэнэ. Хоёр гурваараа, найз нөхөд, гэр бүлийнхний хамтаар автомашин сонирхож явах хүмүүстэй хааяа нэг таарахаас бусдаар “Да хүрээ” зах эл хуль байна. Ченжүүд ч гэсэн “Тийм машин аваарай, төдий хэр төгрөгийн үнэтэй шүү” хэмээн рекламдахаас илүүтэй зарж буй автомашин дотроо “нуугдаастай”.
Нэрээ хэлэхгүй гээд цааргалснаа өөрийгөө Х.Батаа хэмээн танилцуулсан ченж эр “Энэ сард Япон улсаас орж ирж байгаа автомашинуудын үнэ 500 мянгаас хоёр сая төгрөгийн хооронд нэмэгдэнэ. Короновирусын улмаас машины худалдан авалт буурсан ч, үнэ өмнөх жилээс бага зэрэг өссөн” гэсэн шинэ мэдээллийг өглөө. Тэрбээр үргэлжлүүлэн ярихдаа “Япондоо бүрэн оношилгоонд орсон автомашинууд орж ирэх учраас үнэ дагаж чанар сайжирна. Харин одоо зарагдаж байгаа автомашинуудын хувьд бага зэрэг үнээ бууруулж байгаа нь нэмэгдэлгүй үнээр орж ирсэн учраас тэр” хэмээсэн юм.
Банкны лизингээр автомашин худалдан авахад хөөцөлдлөгөө их гардаг. Тиймээс хялбараар нь банк бус санхүүгийн байгууллагын арай өндөр хүүтэй лизинг санал болгохоос өөрцгүй байдаг аж. Ихэнх хүн лизингээр авна уу гэхээс бэлэн мөнгөтэй нь цөөхөн. Ингэж авахад автомашины урьдчилгаа 30 хувийг төлөөд нотолгоо шаардахгүйгээр хотын оршин суугч гэсэн иргэний үнэмлэх, зургаан сарын банкны дансны хуулга байхад л хангалттай. 36 сар буюу гурван жилийн лизингээр банк бус санхүүгийн байгууллагатай гэрээ хийж болдог гэнэ. Иргэдийн хувьд авах гэсэн автомашинаа сонгоод урьдчилгаа хэдэн төгрөгтэй байхад л болох нь ээ.
Сонгинохайрхан дүүргийн иргэн А.Мандахнараас ямар автомашин сонирхож явааг нь асуухад “15 сая төгрөгт тааруулж приус автомашин авах санаатай. Уг нь тоёота приус 40, 41 маркийн цэмбэгэр автомашинууд харлаа. Гэхдээ үнэтэй байна. Багадаа 19-21 сая төгрөгт өгөх гэнэ. Салон нь цагаан өнгөтэй зай талбай их, тохилог тухтай, мэр сэр нэмэлт тоноглолуудтай болоод ирэхээрээ нэгээс хоёр сая төгрөг нэмэгдэж байна. Приус 40 нь долоон хүний суудалтай, приус 41 нь таван хүний суудалтай гэдгээрээ ялгаатай гэнэ. Мэдээж он залуу байх тусмаа үнэд орох юм. Цагаан салонтой приус нь Япон улсдаа үнэтэй зарагддаг гээд хоёроос гурван саяаар илүү үнэтэй байна.
Маргаашнаас 22-ын товчоо орж автомашины үнэ сонирхоно. Олон жил хурааж хуримтуулсан мөнгөөрөө авах гэж байгаа учраас харьцуулж үзээд хямдыг нь авна” гэлээ.
