Эрүүл мэндийн сайдын 2021 оны 239, 254 дүгээр тушаалаар “Коронавируст халдвар (КОВИД-19)-ын батлагдсан тохиолдлын гэрийн тусгаарлалтад эмчлэгдэх өвчтөнд эмнэлгийн тусламж, үйлчилгээ үзүүлэх түр журам”, “Сэжигтэй болон эмнэл зүйн хөнгөн хэлбэрийн шинж тэмдэг илэрсэн өвчтөнийг гэрийн тусгаарлалтад эмчлэх, хянах түр заавар” тус, тус батлагдан эрүүл мэндийн байгууллагууд хэрэгжүүлэн ажиллаж байна.
Нийслэлийн Эрүүл мэндийн газраас гэрийн тусгаарлалтад эмчлэх хянах түр журам, зааврын хэрэгжилтийг 2021 оны 05 дугаарын 15-26-ны өдрүүдэд төвийн 6 дүүргийн 18 Өрхийн эрүүл мэндийн төвийг хамруулан хийлээ.
Өрхийн эрүүл мэндийн төвийн тусламж үйлчилгээний зохион байгуулалт, гэрээр эмчлүүлж буй өвчтөний сэтгэл ханамж, эмчилгээ оношилгооны стандарт, ойрын хавьтлын шинжилгээний хамралт, цахим бүртгэл зэрэг нийт зургаан чиглэлээр үнэлгээ хийсэн бөгөөд харьяа дүүргийн Эрүүл мэндийн төвийн чанарын албаны төлөөлөл болон өрхийн менежер, эмч, сувилагч бүхий нийт 108 хүнд мэргэжил арга зүйн зөвлөгөө өгч, цахим бүртгэлийг сайжруулах нэн шаардлагатай болохыг тодорхойлсон байна.
Үнэлгээний явцад илэрсэн сайн туршлагыг нэвтрүүлэх, дутагдалтай зүйлсийг шуурхай засах, сэргийлэх цогц үйл ажиллагааг даруй эхлүүлэх зорилгоор цахим уулзалтыг 2021 оны 05 дугаар сарын 27-нд зохион байгуулсан юм.
Энэ хүрээнд “Ковидын батлагдсан тохиолдлын тандалт, хариу арга хэмжээ”, “Өрхийн эрүүл мэндийн төвийн сайн туршлага” сэдвээр мэдээлэл хийхэд нийслэлийн есөн дүүргийн Эрүүл мэндийн төвийн удирдлага, тандалтын баг хариуцсан мэргэжилтэн, шуурхай хариу арга хэмжээний багийн төлөөлөл 70 гаруй хүн оролцож, НЭМГ-аас тусламж үйлчилгээг сайжруулах, сайн туршлагыг түгээн дэлгэрүүлэх үүрэг чиглэл өглөө.
Ингэснээр гэрийн тусгаарлалтын үйл ажиллагааны өнөөгийн байдлыг судлан үнэлж, Өрхийн эрүүл мэндийн төвийн давуу болон сул тал, дутагдлыг бодитой тодорхойлсноор иргэдэд үзүүлэх тусламж үйлчилгээний чанар, хүртээмжийг нэмэгдүүлэх чухал ач холбогдолтой арга хэмжээ болсон байна.
НИЙСЛЭЛИЙН ЭРҮҮЛ МЭНДИЙН ГАЗАР
