“Гоёл 2018” наадмын тэргүүн шагналт загвар өмсөгч, топ модель Т.Халиунаа цагтаа загварын тайзыг эзэгнэдэг байсан гоо үзэсгэлэнтэй бүсгүй. 14-хөн наснаасаа загварын тайзан дээр гунхаж байсан түүнийг 32 насандаа Топ модель болоход “Яасан орой авав даа” гэх хүмүүс олон байсан.
Тэрээр загварын тайзан дээр анх алхсанаасаа хойш 18 жилийн дараа, хоёр хүүтэй ээж болсныхоо дараа энэ өргөмжлөлийг хүртсэн. Тэрээр энэ тухайгаа “Тууштай байдлын минь шагналд ирсэн үнэ цэнтэй өргөмжлөл. Би энэ шагналыг авсандаа бахархдаг. Хүмүүс загвар өмсөгч залуусыг гаднаас нь хараад “боловсролгүй, хөнгөн амьдралд дуртай” гэж дүгнэх гээд байдаг, гэтэл тэр залуу өөрийн гэсэн бизнестэй, нэрийн брэндтэй, гадаадад бүтээгдэхүүнээ зардаг дэлгүүртэйг мэддэггүй. Монголын загвар өмсөгчид, загвар зохион бүтээгчид чадварлаг, зорилготой болсон. Бусад хүн яаж ч доромжилсон, уужуу хандаж, дуугүйхэн дор бүрнээ ажлаа хийгээд явдаг. Яагаад гэвэл загвар бол дэлхийн хэмжээний талбар.
Загвар өмсөгч, загвар зохион бүтээгчдэд зах зээл нь нээлттэй байна. Хүн сэтгэж, хийж чадаж л байвал хаана ч хүлээн зөвшөөрнө. Заавал Монголд шигдээд байх шаардлагагүй шүү дээ. Аль ч улсад очоод загвар өмсчихнө, хаана ч дизайнераараа ажиллачихна. Үнэхээр сайхан нээлттэй мэргэжил” хэмээн мэргэжлийнхээ талаар тайлагнажээ.
Түүний хувьд бизнесийн удирдлага, банк санхүүч, эрхзүйч мэргэжилтэй. Ер бол боловсрол өндөртэй модель юм.
