Монголчууд эртнээс гурван хүү төрүүлсэн эхийг “Дархан бэр” хэмээн өргөмжилдөг. Ийнхүү түүнийг хадам эцгийн дайтай хүндэлж, бусад бэрүүдээс өмнө үгээ хэлж, үзэл бодлоо илэрхийлэх, гэр бүлийн шийдвэр гаргах үйлд голлох байр суурийг эзлэх эрхтэй хэмээн үздэг.
Эрх дураараа Жульеттаг бүтээсэн УДЭТ-ийн жүжигчин Г.Номуун “Дархан бэр” болжээ.
Тэр бүр театрынхаа уран бүтээлээс өөр дүрд тоглоод байдаггүй Г.Номуун багаасаа театртай “нөхөрлөжээ”.
Учир нь түүний ээж УДЭТ-т хувцасны эрхлэгч хийдэг байсан тул багаасаа театрын уран бүтээлийг алагсахгүй үздэг байсан гэнэ. Түүний мөрөөдлийн нэг хэсэг нь Жульетта байсан бөгөөд мөрөөдлөө ч биелүүлж чаджээ.
Энэ тухайгаа “Мөрөөдлийн минь нэг дүр яахын аргагүй Жульетта байсан. Мөн монгол цустай, монгол хүн болж төрснийх монгол хатны дүрд тоглохыг хүсдэг” хэмээн ярьсан байдаг.
Тэрээр оюутан байхдаа нөхөртэйгөө танилцаж гэр бүл болсон гэнэ. Г.Номуун “Оюутан байхаасаа л бие биеэ таньдаг байсан. Хань маань надаас хоёр ангиар дээд курс. Тухайн үед нэг сургуулийн оюутнууд, мэндийн зөрөөтэй л явдаг байлаа. Би оюутан байхдаа “ Босго тотго” киноны гол дүрд тоглосон юм. Манай хүн бас тэр кинонд тоглож таарсан. Бид хоёр зураг авалтаар натурт явж ирснээс хойш арай илүү, дотно танилцсан” гэжээ.
