Монголын дэлгэцийн урлагийн өнгийг үе үеийн сайхан бүсгүйчүүд тодорхойлсоор ирсэн. Дээхэн үед тэдгээр сайхан хүүхнүүдийг үзэж харахын тулд театрыг зоригсод олон байсан бол одоо цагт харин борооны дараах мөөг шиг ар араасаа цуврах кино дэлгэцийн талбар тэдэнд том боломж олгож байна.
Хаа газар, ямар ч цаг үед урлагийн ертөнц дэхь шоу талбарт ялангуяа бүсгүй гоо үзэмж, сайхан дүр төрх юу юунаас чухал зүйл байсаар ирсэн. Харамсалтай нь, сүүлийн үед жинхэнэ сайхан хүүхнүүд нь гал тогооныхоо ард үлдэж, жир дундажууд нь миссийн тэмцээнээс авахуулаад дэлгэцийн урлагт хошуурах болсон. Ямартаа Монголын урлаг идеалгүй болчихсон гэх үг чухамдаа энэ үеийнхэнд хаяглагдаж байгаа билээ. Гэвч цаг үе бүхэн баатраа төрүүлдэг жамаар бас ч гэж үзэж харчихаар, нүд баясгачихаар гоо үзэмжит охид төрөн гарч байна. Тэдний нэг бол М.Цэрэндолгор.
МУУГЗ Б.Балхжавын бэр гэдгээр олонд танигдсан тэрээр энэ жил 29 нас хүрнэ. Дөнгөж оюутны ширээнд байхдаа жүжигчин найруулагч Г.Ундармаагын харцанд өртөж, “Тютю” уран сайхны кинод тоглож олон танигдсан тэрээр өдгөө Шүүдэр филмийн “Хотула гүнж” киноны гол дүрд тоглож буй.
Тэр төрж амаржаад долоо ч хонолгүй зураг авалтад оролцож гоо үзэсгэлэн, залуу насаа гайхуулаад авсан. Залуу уран бүтээлчид дундаас ганцаараа шахуу ОХУ-ын Театр урлагийн академи буюу ГИТИС-ийг дүүргэсэн авъяаслаг нэгэн. Түүнийг найзууд нь “Янзага” хэмээн хочилдог бол үзэгчид түүнийг Цэдо гэдгээр нь илүү танина.
