Эмоци хамтлагийнхан хамгийн хамгийнаа шалгаруулжээ. Тэднээс “Ододтой бүжиглэе” шоугаараа олонд танигдсан Жерри буюу Т.Бадамжав хамгийн их иддэгээр шалгарчээ.
Жерри “Улаанбаатар би чамд хайртай”, “Рекет”, “One night”, “ТҮЦ-ний охид” зэрэг дэлгэцийн олон бүтээлд дүрээ бүтээж, өхөөрдөм төрх, авьяас чадвараараа танигдсан залуу жүжигчин. Мөн Алдар+Жерри инээдмийн цувралд тоглосноор нь үзэгчид илүү сайн мэдэх болсон билээ.
Багадаа сэтгүүлч, нэвтрүүлэгч болохыг хүсдэг байсан түүний хүсэл нэг л өдөр тайзнаа “амилсан” “Парисын дарь эхийн сүм”-ийг үзсэнээр өөрчлөгдсөн.
Үүнээс хойш “би яагаад жүжигчин болж болохгүй гэж” гэсэн хүсэл мөрөөдөлдөө хөтлөгдөн СУИС-ын босгыг давж, 2015 онд жүжигчний мэргэжлээр сургуулиа амжилттай төгсөв. Түүнийг жүжигчин болно гэхэд эцэг, эх нь эмэгтэй хүнд хэцүү мэргэжил хэмээн ихээхэн дургүйцэж байсан гэдэг.
