Монголын мэргэжлийн сагсан бөмбөгийн тамирчин, ОУХМ Тунгалагийн Санчирыг танихгүй хүн ховор.
Тэрээр саяхан болж өнгөрсөн “Ододтой бүжиглэе” шоунд тун амжилттай оролцсон. Тэгвэл тэрээр дунд сургуулийн 8-р ангид байхдаа Төв аймгийн Баянжаргалан сумын наадамд түрүүлж “Сумын заан” цолтой болсон байна.
Энэ цолоо хийхдээ тус сумын Засаг дарга Дүүрэн гэдэг хүний дэмжлэгтэйгээр авснаа “Баажи ба Ялалт” шоунд оролцох үедээ нуулгүй ярьжээ.
Түүний төрсөн аавыг Монгол Улсын гарьд Д.Баяраа агсан гэдгийг хүмүүс тэр бүр мэддэггүй. Мөн түүний өвөө Монгол Улсын хөдөлмөрийн баатар, дархан аварга, циркийн гавьяат жүжигчин Дарийн Дамдин юм.
Тэрээр аавынхаа тухай ярихдаа “Аавтайгаа би хамт амьдарч байгаагүй ээ. Намайг жаахан байхад хааяа ирдэг л байсан. Бага байсан болохоороо би аавынхаа талаар сайн лавлаж ч байгаагүй. Сүүлд том болсны дараа хүмүүс эдгээр алдартай сайхан хүмүүсийн хойч үе гэдгийг мэдээд домог мэт яриа өрнүүлдэг. Харин Б.Төрмагнай ахтайгаа дотно. Аймгийн харцага цолтой залуу бий. Өдөр бүр шахуу уулздаг. Нэг зүйл нэмж хэлэхэд, Д.Оюунболд багшид аав намайг “Бөх болгоорой” гэж захисан юм шиг байна билээ. Хамгийн гол би эдгээр буурлуудынхаа нэр хүндийг зөв авч явж, өөрт оногдсон спортын төрөлдөө улам их амжилт гаргахыг хүсч байна” гэжээ.
