Монгол Улсын Шадар сайд, УОК-ын дарга С.Амарсайханг танихгүй хүн үгүй. АНУ-д дээд боловсрол эзэмшиж, дипломат албанд ажиллаж байсан тэрээр Монголын томоохон компаниудын нэг “Оюуны Ундраа Групп”-ийг олон жил удирдаж, бизнесийн хөгжлийг дэмжих зорилготой “СЕО клуб”-ийг нэгэн үе толгойлж байв.
С.Амарсайхан дарга 2012 оноос хойш НИТХ-ын төлөөлөгчөөр хоёр удаа сонгогдож, НИТХ-ын даргаар ажиллаж байгаад өнгөрсөн 2019 онд Улаанбаатар хотын даргаар ажиллаж байв.
Тэгвэл тэрээр өөрийгөө хичээл зүтгэл сайтай хэмээн үнэлдэг гэнэ шүү. Энэ тухайгаа “ Бусдыгаа манлайлж чаддаг бүтээлч сэтгэлгээтэй хүмүүсийг бүх талаас нь дэмжих, хамтран ажиллах, удирдан зохион байгуулах тал дээр өөрийгөө хичээл зүтгэл сайтай гэж боддог. Ийм хүмүүсийг ямар нэг цензур, болзолгүйгээр, өөрт байгаа бүхий л боломжоороо дэмжихэд үргэлж бэлэн байдаг. Санаачилгатай, бүтээлч хүмүүсийг дэмжих энэ зарчим маань иргэдийн ахуй амьдралд шууд нөлөөлөх шийдвэрүүдийг гаргадаг одоогийн ажилд маань ч их тус дөхөм үзүүлдэг гэж боддог.
Ажлаас өөр зүйл гэвэл хоол хийхдээ сайн шүү. Хоол гэдэг сэтгэж хийдэг зүйл учраас ямар ч материалуудыг ашиглан түүртэхгүйгээр, хэлээрээ цааш түлхчихээргүй аятайхан хоол хийж чадна” гэжээ.
