АМРАХ ӨДӨР БИШ АРИУСАХ ӨДӨР
Номын баярын өдрийг хавар, намартаа хоёр удаа тэмдэглэж явуулахаар УИХ-аар хуульчлахаар болсныг номд дуртай соёлт ертөнцийнхэний талархлыг хүлээж байна. Дээр үеэс монголыг “НОМТ ГУРВАН УЛС”-ын нэг гэж бахархалтай үздэг байлаа. Өөрснөө ядуу гучуу мөртлөө алт мөнгө 9 эрдэнийг хайр гамгүйгээр оруулан, номоо бүтээж ирсэн, номыг бурханчлан дээшээ тавьж шүтдэг улс, ард түмэн…
Үүний зэрэгцээ бас л нэг амралтын өдөр нэмэгдэх нь ээ гэж буруу зөрүү ойлгож байгаа солгой дуу хоолой ч сонсогдож байна. Амрах өдрөөс залхаж байна гэдэг буруу ч биш. Үнэндээ ч зарим амралтын өдөр хэрэггүй, илүү юм шиг надад ч санагддаг. Харин номын баяр бол АМРАЛТЫН ТУСГАЙ ӨДӨР БИШ тухайн оны 5, 9 -р сарын бямба, ням гарагийн тэртээ тэргүй амралтын өдрийг л номын өдөр болгохоор төлөвлөж байгаа юм гэж энэ үйлсийг эхнээсээ санаачлан зүтгэж, төр засгийн анхааралд өдий хэмжээнд хүргэсэн “НОМЫН СОЁЛТ ЕРТӨНЦ” төрийн бус байгууллагын тэргүүн Сувд хэлж байна. Түүний уйгагүй зүтгэлийн үр шим яах аргагүй мөн.
Дэлхийн маш олон орон “Номын баяр”, “Номын өдөр”, “Номын яармагийг” зохион байгуулдаг. АНУ-ын сарын календарь дээр долоо хоногийн 2, 3 өдөр нь тэмдэглэлт өдөр байдаг юм билээ. Заримдаа ч бүр утгагүй мэт өдөр ч харагддаг. Ундууцах биш, ухаан тэлэх өдрийг УИХ хуульчлан батлахаар шийдвэрлэж байгаа нь номыг бүтээгч, монгол хэл соёлоо дээдлэгч, номын эрэл хайгуулчид, номыг шимтэн сонирхогч, номыг өөрийн хообий болгогч, номын худалдаачид, ном солилцогсдод “ЭРДЭНЭСИЙН ХААЛГА” нээж өгдөгийг зохиолч миний бие сүүлийн 1О гаруй жилийн турш оролцож байгаагийн хувиар талархаж байна. Энэ өдөр уурлаж уцаарлаж бухимдсан хүнийг хараагүй. Дандаа л сайн сайхныг ярьж хөөрч санал бодлоо солилцдог. Ном өөрөө сэтгэлийг ариусгагч, цоо шинэ ертөнцийг нээгч, оюун тархийг цэнэглэгч, дотоод ертөнцийг баяжуулагч болоод тэр. Бүгд л инээсэн, баяссан, олзуурхсан, урамшсан хүмүүс тааралддаг. Бүр холын аймгаас зорьж ирдэг гэгээлэг хүмүүс ч бий.
Энэ оюунлаг сайхан үйлсийг дэмжсэн УИХ-ын гишүүн асан А.Ундраа, одоогийн гишүүн Б.Саранчимэг нар санаачилж Төрийн ордонд тэмдэглэлт өдрүүдийн хуульд номын өдрийг оруулах төслийг танилцуулж, томхон хэлэлцүүлэг явуулж, үүнийг бичигч ч түүнд оролцож санал бодлоо хуваалцаж байсны хувьд, ийм гэгээлэг өдрийг хуульчлана гэхэд сэтгэл хангалуун байгаагаа илэрхийлж үүнийг бичиглэлээ.
Ертөнцийг ном болоод номт ухаан аварна, соёлт ухаалаг хүмүүс аварна. Номыг хайрлагч, бишрэн шүтэгч хүмүүсээс хэзээ ч муу муухай юм, дайсагнасан сэтгэл гарахгүй ээ. Ном өөрөө ёс зүйг бий болгогч юм. Номын баярт Х.Баттулга ерөнхийлөгч үүргэвч үүрчихсэн жирийн жуулчин шиг л ном цуглуулаад явж тааралддаг. З.Энхболд УИХ-ын дарга байхдаа ч хөхиүн оролцдог байлаа. УИХ-ын өнөөгийн дарга Г. Занданшатар бүр ч онцгой идэвхтэй дэмждэг төдийгүй өөрөө санаачлан хамгийн олон ном уншсан шилдэг уншигчдад “Мазаалайн” дүрстэй “Мэргэн ном” цом гардуулдаг сайхан уламжлал тогтоосон. Энэ жилийн номын баяраар Улаанбаатар хотын дарга Д.Сумьяабазар ний нуугүй сэтгэлээ хуваалцаж, чөлөөтэй ярилцаж явсан нь ерөөсөө дээрээсээ үлгэрлэж байгаа сайхан хандлага гэхээс өөр аргагүй.
Монголын үндэсний номын баярыг хуульчлаад өгсөн цагт хүүхэд багачуудаас авахуулаад бүх хүмүүст эерэг сайхан сэтгэгдэл төрүүлэх нь мэдээж ээ. Энэ буянт үйлсийг эсэргүүцдэг тийм мунхарсан сэтгэлгээ өнөөдөр даанч байхгүй бизээ. Харин АМРАЛТЫН ТУСГАЙ ӨДӨРТЭЙ БАЙХ ЮМУУ? ГЭДЭГТ Л ЭРГЭЛЗЭЖ БУРУУ ОЙЛГОЖ ЯНЗ БҮРИЙН ЯРИА ГАРГАЖ БАЙГАА БОЛОВ УУ?
Ном бол ариусал, ухаарал, хүмүүний ертөнцийг өөрчлөгч гайхалтай ид шидэт ертөнц. Энэ ертөнцийг л ТАНД гардуулах гэж байгаа нь цар тахал улам газар авч бүх хүний сэтгэлийг тавгүйцүүлж байгаа энэ өдрүүдийг гэрэлтүүлж байнаа.
2021 06. 15 21. 50 мин
