Португалийн шигшээ багийн ахлагч Криштиану Роналду өнгөрсөн шөнө Унгартай хийсэн тоглолтын өмнөх хэвлэлийн бага хурлын үеэр ширээн дээр байсан Coca-Cola-ны лонхыг холдуулж “Ус уу” хэмээсэн.
Тэгвэл түүний энэхүү үйлдлийн улмаас Coca-Cola компанийн зах зээлийн үнэлгээ 4 тэрбум ам.доллараар буурсан байна.
Өдгөө 36 настай Роналду хийжүүлсэн ундаанаас татгалзахыг зөвлөдөг, зөв хооллолтыг эрхэмлэдэг нэгэн бөгөөд үүнийхээ ачаар мэргэжлийн түвшинд удаан тоглож байгаа юм.
Роналдугийн үйлдлийн дараа 56.10 ам.доллар байсан Coca-Cola-гийн хувьцааны ширхгийн үнэ 55.22 ам.доллар болж буурсан. Улмаар 242 тэрбум ам.долларын үнэтэй байсан компанийн зах зээлийн үнэ 238 тэрбум ам.доллар болж 4 тэрбумаар буурсан байна. /Зургаадугаар сарын 16-ны 15:30 цагийн байдлаар 55.41 ам.доллар болсон/
Coca-Cola нь EURO 2020 тэмцээний албан ёсны түншээр ажиллаж буй ба Роналдугийн үйлдлийн хариуд “Хүн бүр уух ундаагаа сонгох эрхтэй. Хүн бүр өөр амт мэдрэх хэрэгцээтэй” гэсэн юм.
Мөн EURO-гийн зохион байгуулагчид “Хэвлэлийн бага хурлын үеэр тоглогчдод ус болон Coca-Cola, Coca-Cola Zero санал болгож байна” хэмээжээ.
Инстаграм дээр хамгийн их дагагчтай /300 сая/ хүн К.Роналду Унгарын эсрэг хоёр гоол оруулж баг нь 0-3 харьцаагаар хожсон юм.
Эх сурвалж: TheGuardian
