“Маск” продакшны нүүр царай болсон эмэгтэй жүжигчдийн нэг А.Гэрэлцэцэг энэ жил 40 настай. Хошин урлагийн сайхан бүсгүйчүүдийн нэг гэгдэн олон жил олны нүдний өмнө ил амьдарч ирсэн.
А.Гэрэлцэцэг хоёр жилийн өмнөөс амьдрал зохион үрийн зулай үнэрлэсэн. Олон жил ганц бие бүсгүйн амьдралаар амьдарч явсан тэрээр саяхан нэгэн нэвтрүүлэгт орох үедээ эх хүний жаргал зовлонгын талаар хүүрнэж, төрсний дараах сэтгэл гутралд орж түүнээсээ ангижирсан тухайгаа дэлгэжээ.
Тэрээр “Эмэгтэй хүн ээж болоод би чинь энэ хорвоод чухал үүрэгтэй хүн юм байна гэж бодсон. Ээж болоход ханан дээрх цаг байлаа гэж бодоход тэр цаг одоо л зүү нь гялалзаж чаг чаг хэмээн дуугарч эхлэж байгаа юм шиг тийм л мэдрэмж авсан. Олон жил ганцаараа явж хожуу гэр бүл зохиосон болохоор ээж байх, эмэгтэй хүн байх хоёрын ялгаа надад хурц мэдэгдсэн. Хүүхэдгүй байхдаа хий хоосон үүлэн дээр хөвж явсан юм шиг. Зовлонг өөртөө шингээгээд аз жаргал болгон түгээдэг хүн бол эмэгтэй хүн юм байна” хэмээн ярьжээ.
Мөн тэрээр дундуур байсан амьдралыг нь дүүрэн болгосон ханьдаа талархаж байгаагаа илэрхийлсэн байна. Түүний ханийг Г.Батсайхан гэдэг бөгөөд Хан-Уул дүүргийн Засаг даргын орлогч хийдэг аж. Тэрээр анхны эхнэрээ харамсалтайгаар алдаж, олон жил ганц бие амьдарсан даруухан нэгэн аж. 1974 онд төрсөн тэрээр 1998-2000 онд ХБНГУ-ын Хумболдтын их сургууль, Удирдлагын академи, ГЭЗДС-ийн Гаалийн эрх зүйн ангийг дүүргэсэн Герман, Англи хэлтэй шаггүй боловсролтой нэгэн гэнэ.
Мөн Гаалийн Ерөнхий Газарт мэргэжилтэн, хэлтсийн дарга, “BG” Констракшин ХХК-ийн Ерөнхий захирлаар ажиллаж байсан Г.Батсайхан 2016 оноос ДИТХ-ын Төлөөлөгч, Засаг даргын нэгдүгээр орлогч, ДИТХ дахь МАН-ын бүлгийн даргаар ажиллаж байгаа.
