Засгийн газраас Үндэсний их баяр наадмыг үзэгчгүй, цахимаар явуулах шийдвэрийг гаргасан билээ. Үүнтэй холбоотойгоор зохион байгуулалтын асуудлаар Үндэсний их баяр наадмыг зохион байгуулах комиссоос мэдээлэл хийлээ.
Энэ үеэр Үндэсний их баяр наадмын найруулагчийн багийн найруулагч Г.Цоггэрэл мэдээлэл өглөө.
Тэрээр “100 жилийн наадмыг гурван найруулагчтай зохион байгуулъя гэсэн санал гаргаад Б.Баатар, Н.Наранбаатар бид гурав ярилцаж байж орсон. Бид цар тахлын үед байгаа учраас наадмыг цахимаар зохион байгуулж магадгүй, гэхдээ үзэгчтэй хийнэ гэж үзээд хоёр хувилбараар бодож байсан. 2000 гаруй хүний бүрэлдэхүүнтэй зохиол гаргаад албан ёсоор танилцуулсан. Гэтэл цар тахалтай үед энэ олон хүнийг нэг дор цуглуулж болохгүй гээд цахимаар явуулах шийдвэр гаргасан. Тиймээс уран бүтээлчдээ багасгасан. Өчигдөр цахим наадмын зохиолоо танилцуулсан. Нийтдээ 250 уран бүтээлч оролцоно. Мөн 100 цэрэг оролцоно. Уран бүтээлчдийг Хүй долоон худаг дээр 7 хоног тусгаарлаад, бичлэгээ хийнэ.
Өнгөрсөн жилийн наадмаас огт өөр болно. Үүнийг бид Б.Баатараас шаардаж байгаа. Б.Баатарын найруулгыг пордесрын багууд хянадаг. Энэ жил “Нарны домог” концепцыг барьж байгаа. 2016-2020 он хүртэл наадмын нээлт хаалт 600 сая байсан. Одоо бол 850 сая байгаа. Өдөр бүхэн хамгаалалт, ариутгал хийж байна. Мөн уран бүтээлчдийнхээ дархлааг унагаахгүйн тулд амин дэмтэй хоол өгч байна” гэлээ.
