Цахим наадамд УДЭТ, Үндэсний Урлагийн их театрын уран бүтээлчид оролцохоор бэлтгэлээ базааж буй талаар өчигдөр нэгэн мэдээллийг сувгаар гарсан.
Уг асуудлын улмаас иргэд үзэл бодлоо илэрхийлж, уран бүтээлчдийг оролцохгүй байхыг шаардах болсон. Тэгвэл сар орчмын өмнө МУГЖ болсон жүжигчин Д.Ганцэцэг уран бүтээлчдийг харааж, зүхэхгүй байхыг хүсчээ.
Тэрээр “Бид Наадам хийхийг мөн ч их эсэргүүцлээ. Тэд мөн ч их гүрийлээ. Ингээд Цахим Наадам болдгоороо болох шинжтэй. За яах вээ, нээрээ л Эх орны дайны үед Эр цэргүүдийн галыг унтраахгүй,ирийг мохоохгүйн тулд Дайны талбарт уран бүтээлчид очин тоглолт хийж байсан Түүхийг бодож дотроо уужруулж сууна …
Нэгэнт Төр Засаг нь шийдвэрээ өөрчлөхгүй гаргасан шийдвэртээ бат нот зогслоо…
Харин тэр шийдвэрийн дагуу ажил үүргээ гүйцэтгэж буй Төрийн үйлчилгээний байгууллагын уран бүтээлчдээ элдэв бусаар “харааж ерөөхөө” больё тэгэх үү …
Төрийн гаргасан тогтоол, шийдвэр, захирамжийн дагуу ажил үүргээ гүйцэтгэдэг Улсын Драмын Эрдмийн Театр, Үндэсний Урлагийн Их Театр, Дуурь Бүжгийн Эрдмийн Театр зэрэг төрийн үйлчилгээний байгууллагын уран бүтээлч нараа хар муу үгээр бүү давшлаарай гэж нэгэн цагт мөр зэрэгцэн ажиллаж байсан эрхэм уран бүтээлчдээ “өмгөөлөн” бичлээ.
Би ч Театртаа байсан бол ЗГ-н шийдвэрийн дагуу Наадмын үйл ажиллагаанд үг дуугүй оролцох л байсан байх даа………..
Уран бүтээлчиддээ амжилт хүсч, сайныг ерөөе” гэжээ.
