“Гэрлэн дохио” телевизийн олон ангит кино болон “Аз жаргалийн шок”, “Том толгойтын романс” бүтээлд гол дүр бүтээж “Зүрхний хилэн”, “Цасан охин”, “Намрын синдром”, “247 градус” кинонд ажилласан Улсын драмын эрдмийн театрын жүжигчин, соёлын тэргүүний ажилтан Б.Одончимэг өнгөрсөн амралтын өдөр 36 насны төрсөн өдрөө нижгэр тэмдэглэжээ.
Гал цогтой төрх, гоо үзэсгэлэнгээр үзэгчдийн харцыг булаадаг тэрээр 2008 онд Соёл урлагийн их сургуулийг жүжигчний мэргэжлээр төгсөж, 2011 оноос одоог хүртэл УДЭТ-т жүжигчнээр ажиллаж байгаа аж.
Тайз, дэлгэцийн олон дүрээр үзэгчдэд танигдсан жүжигчин бүсгүйн хувьд зөвхөн эх орондоо сайн уран бүтээлчээр дуудагддаггүй.
Тэрээр хоёр жилийн өмнө Энэтхэгийн Колката хотод зохион байгуулагдсан “International theatre – 2019” олон улсын наадмын нэг хүний жүжгийн төрөлд түрүүлж байсан билээ.
