Жүжигчин гэхээсээ дуучин хэмээн дуудуулах болсон уран бүтээлч Л.Сөрөлтийг танихгүй хүн ховор. Өдгөө 36 настай түүнийбага нас Хөвсгөл аймагт өнгөрсөн гэдэг.
Багаасаа урлагт хайртай, дуртай тэрээр хичээл сурлагаас илүү урлагийн авьяасаараа нэгэн цагт оны шилдэг сурагчаар тодорч явжээ.
Энэ тухайгаа ч дурсах дуртай байдаг гэнэ лээ.
Тэрээр бага насныхаа тухай дурсахдаа “Аав, ээжийнхээ хүмүүжлээр харин ч даруухан хүүхэд байсан. Миний бага нас Хөвсгөл далайн гүн цэнхэр усанд л шумбаж өнгөрсөн дөө. Аав минь Хөвсгөлийн тусгай хамгаалалттай газрын ой хамгаалагчаар ажилладаг байлаа. Манайх 1990-ээд онд далайн түвшнээс дээш 1700 метрт оршдог Урандөш гэж сайхан хайрханы энгэрт өвөлжиж, би аавыгаа дагаад л байгаль дэлхийгээ хамгаалах ариун үйлст нь явж байлаа.
Тэр үед аав минь өнөөгийн сүр дуулиантай тэмдэглээд байгаа “Мөсний баяр”-ыг хамгийн анх санаачлан далайн захад дархад, цаатнуудтай хамт хийж байсан сайхан дурсамж ч бий” гэжээ.
