Монголын улс төрийн тогоонд олон жил явсан УИХ-ын гишүүн асан Р.Гончигдоржийн хүү Г.Эрдэмхишиг Монголын ротари клубын ерөнхийлөгч болжээ. Тэрээр өчигдөр Ерөнхийлөгчийн тэмдэгээ гардан авсан бөгөөд монгол дахь хүмүүнлэгийн ажлуудыг хариуцлахаар болжээ.
Монголын ротари байгуулагдаад 26 жилийн нүүр үзэж буй хүмүүнлэгийн сайн сайхны төлөө үйл ажиллагаа явуулдаг олон улсын байгууллага юм. Анх 1905 онд АНУ-ын Чикаго хотод байгуулагдсан түүхтэй.
Монгол улс 115 жилийн түүхтэй энэ байгууллагын гишүүн болох эхлэл анх 1995 онд “Улаанбаатар Ротари” нэртэй анхны клуб байгуулагдсанаар тавигдсан байдаг.
1995 оноос өнөөг хүртэлх хугацаанд Монголын Ротари байгууллага 18 Ротари клуб (үүнд 30-аас дээш насныхан хамрагдана), 15 Ротаракт клуб (18-30 нас), 4 Интеракт клуб (12-18 нас) клубүүдээр хүрээгээ тэлж эгнээндээ 1000 гаруй гишүүдийг нэгтгэн үйл ажиллагаагаа явуулж байна.
Тун удахгүй Ротаричууд бид 2020-05-15 нд өөрсдийн гишүүд дэмжигчид , тэдний гэр бүл найз нөхөд, мөн төслийн хамтрагч нартайгаа Монголын Ротари байгууллага үүсч байгууллагдсаны 25 жилийн түүхэн ойгоо тэмдэглэн өнгөрүүлэх гэж байна.
Өнөөдөр дэлхийн 1,2 сая Ротаричууд сайн дурын үйл ажиллагаанд 111,1 сая цагийг зарцуулж “Саа өвчнөөс ангид дэлхий ертөнцийг бий болгох” урианд нэгдэн 1985 оноос хойш 2,5 тэрбум хүүхдийг вакцинжуулан эмчилж, аюулт өвчнийг ангижруулж, энэ аймшигт өвчнийг дэлхий даяар устгах ариун үйлсэд гол хувь нэмрийг оруулсан сайхан түүхтэй. Энэхүү гайхамшигт үйл ажиллагаа нь дэлхийн хүмүүнлэг үйлсийн манлайлагч Билл Гэйтс нарыг ч эгнээндээ нэгтгэж чадсан ба түүний өөрийн сангаараа дамжуулан жил бүр хандивласан нэг сая ам долларын хөрөнгө оруулалт ирээдүй хойч үеийн эрүүл мэндэд зориулагддаг юм.
Ротари ирээдүйн манлайлагчдыг бэлтгэх зорилгынхоо хүрээнд Ротарийн үйл ажиллагааныхаа үндсэн 6 чиглэлээр суралцах зорилготой залууст жил бүр 7.5 сая ам. долларын үнэлэмж бүхий сургалтын тэтгэлгийг гардуулдаг дэлхийн томоохон сангуудын нэг бөгөөд өдгөө 350,000 гаруй тэтгэлгийг олгожээ.
1995 оноос хойш Монголын Ротаричууд суурь боловсролыг дэмжих 68, Өвчнөөс урьдчилан сэргийлэх 70, Эх хүүхдийн эрүүл мэнд 48, Цэвэр усны хангамж 15, Бүс нутгийн эдийн засгийг дэмжих 15, Байгаль орчныг хамгаалах 15, болон Залуу үеийг дэмжих 17, хүмүүнлэгийн чиглэлээр гээд 250 гаруй удаагийн төслүүдээр нийтдээ 10.8 сая ам.долларын өртөг бүхий төслүүдийг эх орондоо болон гадаад улсуудад амжилттай хэрэгжүүлжээ.
