Үйлдвэр Хүнс, хөдөө аж ахуйн яамнаас шаардлага хангаагүй компаниудад 73.9 тэрбум төгрөгийг зээлт олгосон зөрчлийг 2015 онд Үнэ тогтворжуулах хөтөлбөрийн хэрэгжилтэд хийсэн аудитын тайланд маш тодорхой дурдсан байдаг.
Тухайлбал, уг дэд хөтөлбөрийг хэрэгжүүлэх Аж ахуйн нэгжийн сонгон шалгаруулалтыг үзэхэд 2-6 шалгуур үзүүлэлтийг хангаагүй Жавхлант групп ХХК зэрэг нэр бүхий долоон гурилын үйлдвэрийг шалгаруулж, нийтдээ 73.9 тэрбум төгрөгийн зээл олгосон нь ҮХААЯ энэхүү дэд хөтөлбөрийн 2.7.2 дахь заалтыг зөрчсөн болохыг уг шалгалтаар тогтоож, аудитын дүгнэлтийг гаргасан байдаг.
Түүнчлэн 2015 онд үнэ тогтворжуулах хөтөлбөрийн хэрэгжилтэд хийсэн аудитын шалгалтаар хөтөлбөрийг хэрэгжүүлэх ААН-ийн сонгон шалгаруулалтыг явуулахдаа ҮХААЯ-ны боловсруулсан “Төсөл сонгон шалгаруулах баримт бичиг”-ийн шалгуур үзүүлэлтийг хангаагүй, ААН-ийг шалгаруулж, 35.4 тэрбум төгрөгийн зээл олгосон нь дэд хөтөлбөрийн 2.7.2 дахь заалтыг зөрчсөн болохыг тогтоосон байна.
Үүсгэн байгуулагч нь Батсайханы Тэнгис, гүйцэтгэх захирал нь Эрдэнэтуяагийн Энхмөнх гэгч ажилладаг Жавхлант групп ХХК нь Үнэ тогтворжуулах хөтөлбөрөөс 2.200.000.000 \хоёр тэрбум\ төгрөгийн зээл авсан байдаг бөгөөд Сүхбаатар дүүргийн хоёрдугаар хороонд оршдог гэсэн хаягтай. Тус компанийн гурилын үйлдвэр нь 2014 онд анх ашиглалтад орж 2016 оны 12-р сараас тасралтгүй үйл ажиллагаа явуулан ажиллаж байгаа гэх бөгөөд Гацуурт компанийн охин компани юм байна.
\доорхи зураг нь 2015 оны Гацуурт компанийн бүх охин компанийн захирлууд болон төлөөллийн жилийн эцсийн үр дүнг тооцох хурал дээр авсан агшин болно\
Энэ талаар тус компанийн албан ёсны мэдээллийн санд Гацуурт ХХК нь 2015 оны жилийн эцсийн тайлангийн хурлаа компанийн төв байранд зохион байгуулж байна. Уг хуралд нийт алба хэлтэс, салбар нэгж, охин компаниуд оролцоно…. Эхний ээлжийн хуралд Төв компанийн алба, хэлтэс, Газар тариалангийн салбарууд, Автобааз, уурхайн салбарууд тайлангаа тавих бөгөөд хурлаар төлөвлөгөө, ажлын биелэлт, үйл ажиллагааны талаар хуралдаж шийдвэрлэх болно. Харин дараагийн ээлжийн хуралд Гацуурт мах ХХК, Мал аж ахуй, Мал эмнэлэг, Жавхлант групп, Хүнс трейд ХХК, Стандарт ремикум ХХК, Монгол ТВ ХХК, Брикланд ХХК, Тэрэлж сүйх ХХК, Гацуурт пропортиес ХХК оролцоно… гэсэн мэдээллээр баталгаажиж байгаа юм.
