Жирэмсэн эх коронавирусийн халдвар авч, хүндрэх тохиолдол эрс нэмэгдэх болсон. Тэр бүү хэл, жирэмсэн үедээ амиа алдах эрсдэл өндөр буй.
Хэдийгээр Ковид-19-ийн дэгдэлт эхлээд өдгөө 2 жил гаруйн хугацаа өнгөрсөн ч судлагдаагүй үлдсэн олон зүйлс байсаар байна.
Тодруулбал, эхэд болон урагт жирэмсний хугацаанд, цаашдын амьдралд хэрхэн нөлөөлөх болон ямар хүндрэл үүсэж болзошгүй талаар тогтсон нэг хариулт өгөх боломжгүй. Харин сүүлийн үед эмэгтэйчүүдийн эмч нар Ковид-19 вирусын тархалтын үед жирэмслэхгүй байхыг зөвлөх болжээ. Учир нь ургийн эндэгдэл өндөр байгаа гэнэ.
Иргэн М өнгөрсөн 9-р сард таван сартай жирэмсэн байжээ. Гэвч гэр бүлээрээ короновирусын халдвар авч, иргэн М-ийн биеийн байдал эрс хүндрэн эмнэлэгт хүргэгдсэн байна.
Эмнэлэгт хэвтэж байх хугацаандаа ургийн зүрхний цохилт хэвийн байсан бөгөөд 7 хоног эмчилгээ хийлгээд гарахад эмч нь ургийг нь хэвийн хэмээн дүгнэсэн байна. Гэвч эмнэлгээс гарсныхаа орой нь гэнэт ус нь гарч, ураг нь энджээ. Тэрээр түргэнээр Улсын нэгдүгээр эмнэлэгт хүргэгдэн очиж, эмийн аргаар амьгүй ургаа төрүүлсэн байна.
Төрөхийн эмч нарын хэлж буйгаар халдвар авсан жирэмсэн бүсгүйчүүдийн ураг эндэх явдал багагүй тохиолдож буйг сануулан, эхийг тайвшруулсан байна.
Тэгвэл сүүлийн үеийн болох “Оксфорд” их сургуулиас дэлхийн 18 улс орны 2100, “BMJ” эрүүл мэндийн тэргүүлэх судалгааны байгууллагын 68 мянга гаруй жирэмсэн эмэгтэйг хамруулан хийгдсэн судалгаанууд дээр үндэслэн Ковид-19 өвчин жирэмсэн эхэд болон урагт хэрхэн нөлөөлөх талаарх мэдээллийг уншигч танд сонируулж байна. Эмч нарын хэлж буйгаар 28-дах долоо хоногоос хойш буюу жирэмсний сүүлийн гурван сарын хугацаанд онцгой анхаарал хандуулах шаардлагатай аж.
Энэ хугацаанд өвчилсөн тохиолдолд амьсгалын дутагдалд орох, уушги болон бусад эрхтэн гэмтэх, халдварын шинж тэмдгүүд хүндрэх эрсдэлтэй байдаг. Учир нь жирэмсний бусад үетэй харьцуулахад сүүлийн гурван сарын хугацааны үед эрсдэл үүсэх магадлал 2-3 дахин нэмэгдэнэ.
Энэ хугацаанд ургийн хэмжээ томорч хэвлий хэсэг амьсгалын тогтолцоонд нөлөөлөх, зүрх судасны тогтолцооны эрхтнүүдийн ачааллыг нэмэгдүүлдэг нь биеийн байдлыг хүндрүүлдэг байна. Жирэмсний 22-37 хоногийн хугацаатай дутуу төрөх магадлал 12.9-28.6%-иар нэмэгдсэн нь судалгаагаар батлагдсан байна.
Мөн эрсдэлт бүлэгт 35 ба түүнээс дээш насны эхчүүд, биеийн жингийн өндөртэй, суурь өвчин буюу чихрийн шижин, бронхит, зүрх судасны эмгэг гэх мэттэй тохиолдолд эмчийн тусгай хяналтад байж, онцгой анхаарал хандуулах шаардлагатай байгаа аж. Учир нь эдгээр хүчин зүйлс нь өвчний хүндрэх эрсдэлийг нэмэгдүүлнэ.
Судалгаагаар жирэмсэн эмэгтэйчүүд нь нөхөн үржихүйн насанд буй жирэмсэн бус эмэгтэйчүүдтэй харьцуулахад тодорхой шинж тэмдэггүй өвчлөх магадлал 5 дахин, амь насаа алдах эрсдэл 2 дахин их байгаа ажээ.
