Одоогоос хэдэн жилийн өмнө “Чандмань эрдэнэ” дууг уянгалаг, нандин хоолойгоороо эгшиглүүлж байсан
дуучин М.Янжиндарь буюу олноо Дарьяа хэсэг хугацаанд уран бүтээлээ завсардуулсны эцэст урлагтаа эргэн иржээ.
Түүний дуулсан энэхүү дуу тухайн үедээ олны магтаал сайшаалыг хүртэж, урлагийн томчуудаас урмын үгсийг харамгүй авч байсан юм.
Тухайлбал, Төрийн шагналт хөгжмийн зохиолч Н.Жанцанноров эмэгтэй хувилбараар нь сонсогчдод хүргэсэн дуучин бүсгүйг “уран дуулалттай” хэмээн үнэлж байгаагаа илэрхийлж байв.
Олны хайр хүндэтгэлийг хүртээд удаагүй байхдаа дуучин Дарьяа хувийн амьдралдаа анхаарлаа хандуулж, гэр бүл зохиож өдгөө хоёр охины ээж болжээ.
Гэхдээ тэрээр урлагаас бүр мөсөн яваагүй. Өнгөрсөн хугацаанд олны танил уран бүтээлч “найз”-уудынхаа тайзны гоёл, гоёлын дээл хувцасыг төрсөн эгч М.Ганчимэгийн хамт урлаж, “Гоо марал” гэдэг үндэсний хувцасны салон нээсэн авьяас, сэргэлэн нь хосолсон бүсгүй.
Тэгвэл тэрээр саяхнаас хувийн уран бүтээлдээ эргэн орж, “Хайр ямар…” нэртэй гэгээлэг “хөөрхөн” дууг олны хүртээл болгоод байна.
Дашрамд дуулгахад, дуучин Дарьяагийн хань нөхөр Ц.Элбэгзаяа нар мэргэжил нэгт бүтээлчид бөгөөд хамтдаа улсын нийслэлээ магтаж “Улаанбаатар” дууг гаргаж байсан юм. Дуучин Ц.Элбэгзаяагийн хувьд Хэнтий аймгийн Баян-Адарга сумын харъяат нэгэн билээ.
