Одоогоос хэдэн жилийн өмнө Asia’s Got Talent наадмын интерактив тайзнаас Азид өөрсдийгөө сурталчилж чадсан хамтлаг бол Хөсөгтөн байлаа.
Тэдний хийдэг зүйл бол олон зуун жилийн өмнөөс уламжлагдан ирсэн өвөг дээдсийн хосгүй өв соёлыг өвлөж, тодорхой хэмжээнд хөгжүүлж, түгээн дэлгэрүүлж, залуучуудад сурч мэдэх эрмэлзэл төрүүлэх. Хэзээ нэгэн цагт бид нарын хойч үе бас ардын урлагаа өвлөн авч, өөрийн орших орчин цагтаа хөгжүүлэхийг чухалчлах гэнэ лээ.
Хөсөгтөн хамтлаг бүрэн бүрэлдэхүүнээрээ зургуулаа. Гэвч өнгөрсөн хоёр жилийн хугацаанд ковидын дэгдэлтийн улмаас хамтлагаараа шинэ уран бүтээл хийж амжилгүй өдий хүртээ. 
Тус хамтлагийн морин хуурч В.Батзориг сошиалд хамгийн идэвхитэй амьдардаг нэгэн. Тэрээр нэгэн хэвлэлд өгсөн ярилцлагандаа “Би өөрөө хөдөө төрж, нүүдэлчин амьдралд өссөн. Нүүдэлчин амьдралдаа маш их хайртай. Монгол хүн болж төрсөндөө бахархдаг. Ази тивд тэр чигтээ адилхан хар толгойтой хүмүүс байхад бидний онцлог юу юм бэ гэхээр энэ амьдрал минь л байна. 
Магадгүй өнөөгийн залуучууд маш сүрлэг, сүндэрлэсэн хот суурин, дээд зэргийн хөгжилтэй иргэншлийг хүсдэг бололтой. Мэдээж тийм хот байж болно. Тэгэхдээ бидний хамгийн хайрлаж хамгаалж, авч явах ёстой зүйл бол нүүдэлчин, мал аж ахуйн амьдрал. Дэлхийд үүгээрээ л бид онцгой. Мэдээж урлагийн карьер маань дуусаад тэтгэвэртээ гарах тэр цагт сайхан хөдөө очиж амьдaръя гэж боддог. 
Одоо бол нутагтаа хаяа очихдоо уулан дээр гарч, дээлтэйгээ байгалийн сайхныг харж, хээрийн салхинаа морин хуураа тоглоод, магтаалаа хэлж, хөөмэйлж суух надад үнэхээр гоё байдаг” хэмээн дотроо уудалжээ.
