Өнгөрөгч долоо хоногт ШӨХТГ-ын Ажлын хэсэг Эмээлтэд үйл ажиллагаа явуулдаг Эм Ди Си Пи гэх мах бэлтгэх үйлдвэр шалгалт хийсэн. 
Шалгалтын үеэр бэлтгэж буй махаа бодисоор угааж үнэрийг нь дардаг байсан байж болзошгүй нөхцөл байдал тогтоогдсон бөгөөд махнаас авсан дээжид МХЕГ-ын лабораторид шинжилгээ хийж байгаа аж.
ШӨХТГ-ын дарга С.Мөнхчулууны хэлж буйгаар тухайн үйлдвэрийн агуулахад манай улсад дотооддоо үйл ажиллагаа явуулдаг “ХКҮ” компанийн шошго бүхий мах байжээ.
Тус компани нь үндэсний ууган үйлдвэрийн нэг “Мах импекс” компанитай хамааралтай үйлдвэр аж. Өөрөөр хэлбэл, “монголоо мандуулъя” хэмээн монголчуудынхаа хулихан дээр цэцэг ургуулж сонгогдож явсан экс Ерөнхийлөгч Х.Баттулгын хувьчилж авсан “Мах импекс”-д тус шаардлага хангаагүй бохир махаа бэлтгүүлдэг байсан уу гэх асуудал урган гарч буй юм.
“ХКҮ” компани нь экс Ерөнхийлөгч Х.Баттулгын төрсөн эгч Х.Цэндбаяр тус компаниас хувь эзэмшдэг болохыг та дараах УБЕГ-ын баримтаас харж болно.
Одоогоос 15 жилийн өмнө буюу 2007 онд байгуулагдсан тус компани Хиам, хиаман бүтээгдэхүүн үйлдвэрлэл явуулахаас гадна, Консервын үйлдвэр эрхэлдэг юм байна. Мөн гадаад худалдаа, спортын клубын үйл ажиллагааг явуулдаг аж.
Өмхийсөн махыг химийн бодисоор угааж үнэр амтыг дардаг байсан гэх Эм Ди Си Пи гэх мах бэлтгэх үйлдвэрийн хувьд хятад эзэнтэй, 2006 оноос үйл ажиллагаагаа ноос угаах үйлдвэр гэх чиглэлээр эхлүүлж байсан ч 2018 оноос мах боловсруулж, монголчуудад нийлүүлж эхэлжээ. Дээрх байгууллагуудтай холбоотой асуудал дэгдэж байх энэ цаг үед Мах импекс компаниас мэдэгдэл гаргаж, “Манай компанийн бүтээгдэхүүний шошго, барааны тэмдэг их хэмжээгээр олдсон байна.
Тус Эм Ди Си Пи компани манай компантай ямар нэг гэрээ хэлэлцээр хийлгүйгээр хуурамч шошго, барааны тэмдэг ашиглан хэрэглэгчдийг төөрөгдүүлсэн тул хуулийн байгууллагаар шалгуулахаар өгсөн” хэмээн онцолсон байна.
Ямартаа ч, олон монгол иргэнийг хорт хавдартай болох суурийг тавьж буй мах боловсруулах хараа хяналтгүй, хятад эзэнтэй үйлдвэрүүдэд ямар хариуцлага тооцохыг харах л үлдлээ.
