Хөгжлийн банкны хэргийн урьдчилсан хэлэлцүүлэг өнөөдөр хоёрдахь өдрөө үргэлжилж байна. 250 гаруй оролцогчтой тус хэргийн эргэн тойрны асуудал олны анхаарлыг татаад байгаа юм.
Тэр тусмаа банкнаас зээл аваад эргэн төлдөггүй бүлэг этгээдүүд тус банкны хэргээр ил болсон. Тухайлбал, “Бэрэн” группын эзэн Б.Мөнхтөр банкнаас зээлсэн мөнгөөрөө казино тоглож, хууль бусаар ашигладаг байж болзошгүй гэх асуудал хөндөгдсөн.
Энэ талаар УИХ-ын гишүүн Б.Энхбаяр Хөгжлийн банкны сонсголын үеэр “Макао чөлөөт бүсэд казиногийн АТМ машинаас маш их хэмжээний бэлэн мөнгөний гүйлгээ гараад байгаа. 2018 оны 1 сарын 31-нээс эхлээд казиногийн атм-ээс бэлэн мөнгө гарсан байна. Сингапурт мөн гарчээ” хэмээн хэлсэнд Б.Мөнхтөр “Шинжээчийн дүгнэлттэй санал нийлэхгүй байна. Би шүүх дээр баримтаар нотлох болно” хэмээж байв.
Тэгвэл өнөөдөр тэрбээр дээрх нотолгоонуудаа аваад шүүх дээр ирснийг зөвхөн манай сайтын папараци дуран онцлон буулгалаа.
Яллагдагч Б.Мөнхтөрийн хувьд зөвхөн Хөгжлийн банкнаас зээл аваад эргэн төлөхгүй байгаа биш. Өмнө нь “Гэр хорооллын дахин төлөвлөлт” зэрэг төслөөс их хэмжээний мөнгийг өм цөм идэж, эргэн төлөхгүй, хийж бүтээхгүйгээр хариуцлагын ард сугарч үлддэг нэгэн юм. Учир нь өөрийнхөө эргэн тойронд нөлөө бүхий эрх мэдэлтэн, улс төрийнхнөөр хамгаалуулдаг гэх яриа ч байдаг. Энэ утгаараа мэдээлэлд хамгийн ойр байж, энд тэндээс хэдэн зуун сая, хэдэн арван тэрбум төгрөгийг өм цөм иддэг “шимэгч” нэгэн болохыг мэдэхгүй хүн цөөн.
Ямартаа ч, улсын мөнгийг зээл нэрээр аваад буцааж төлдөггүй, хариуцлага хүлээхийг мэддэггүй “Бэрэн” группын эзэн Б.Мөнхтөрийн гэрэл зургуудыг сонирхуулж байна.
