Өөрийнхээ хичээл зүтгэлээрээ амьдралаа авч яваа Э.Энхболд

Говь брэндийн нүүр царай болон олон танигдсан загвар өмсөгч Э.Энхболдыг Монголын эрэгтэй моделиудаас хамгийн чадварлаг нь гэлцдэг. Авьяас чадвараас гадна хувийн амьдралаа гайхалтай сайн авч явдаг түүнийг шүтэн бишрэгчид төдийгүй мэргэжил нэгтнүүд нь хүндэлдэг. Олон жил төлөвлөсөн байшингаа өөрийн гараар барьж, эхнэртээ 10 жилийн өмнө өгсөн амлалтаа марталгүй төрсөн өдрөөр нь автомашин бэлэглэсэн Энхболдыг халамжит хань, сайн аав гэлцдэг. Үүнийгээ ч тэрээр үг үйлдлээрээ батлан харуулж яваа. “Зөвхөн загвар өмсөөд гэр бүлээ хан­галуун авч явж, амьдрал ахуйгаа болгоно гэдэг бэрх л дээ. Загварын томоохон шоу жилдээ тун цөөхөн зохиогдоно. Брэндийн нүүр царай болж, зураг авалтад орсон ч тэр цалингаар өнөөгийн нийгэмд амьдрах боломжгүй. Мөн жил ирэх тусам загвар өмсөгчдийн тоо өсөж, тэр чинээгээрээ өрсөлдөөн маш их болж байна. Тиймээс загвартаа ажиллахаас гадна мэдлэг боловсролоо зузаатгаж, санхүүгийн өөр эх үүсвэр болох ажил эрхэлж байх хэрэгтэй” хэмээн ярьсан тэрбээр үнэхээр л гэр бүлээ өөрийн хүчээр авч яваа нэгэн юм.