УИХ-ын гишүүнээр 2004-2008 онд ажиллаж байсан “Симба” гэгдэх Ц.Батааг өнгөрсөн оны наймдугаар сард барьцаалж, машиныг нь хулгайлан, их хэмжээний мөнгийг нь дээрэмдсэн хэргийн талаар бид өмнө нь мэдээлж байсан билээ.
Нийслэлийн прокурорын газраас иргэн У.Баатаржав, Н.Наранбаатар, М.Отгонсүх нар нь зөвшөөрөлгүйгээр бусдын орон байранд нэвтэрч, иргэн Ц.Батаад хүч хэрэглэн “Хүннү палас” зочид буудалд хууль бусаар хорьж, 98 сая төгрөгийг шилжүүлэн авсан, мөн хуурамч мөнгөн тэмдэгт, галт зэвсгийг хууль бусаар хадгалсан гэх хэрэгт
Эрүүгийн хуулийн 13.2 дугаар зүйлийн 1 /Хулгайлах/,
13.4 дүгээр зүйлийн 1 /Хүнийг хүчээр алга болгох/,
13.6 дугаар зүйлийн 2 /Бусдын орон байранд хууль бусаар нэвтрэн орох/,
11.6 дугаар зүйлийн 2 /Хүний эрүүл мэндэд хөнгөн хохирол санаатай учруулах/,
17.2 дугаар зүйлийн 2 /Дээрэмдэх/,
20.4 дүгээр зүйлийн 1 /Галт зэвсэг, галт хэрэгсэл, тэсэрч дэлбэрэх бодис хууль бусаар эзэмших/,
18.7 дугаар зүйлийн 1 /Мөнгөн тэмдэгт, үнэт цаас, төлбөр тооцооны хэрэгсэл хуурамчаар бэлтгэх, ашиглах/-т зааснаар яллах дүгнэлт үйлдэн Сүхбаатар дүүргийн эрүүгийн хэргийн анхан шатны шүүхэд шилжүүлсэн байна.
ЦЕГ-ын Хэвлэл мэдээллийн төвөөс “2023 оны наймдугаар сарын 4-нд Хан-Уул дүүргийн нутаг дахь орон сууцад зөвшөөрөлгүй нэвтэрч хохирогчийг хулгайлан, түүнд хүч хэрэглэн 98.5 сая төгрөгийг дээрэмдсэн үйлдэлд холбогдсон гурван хүнийг ЭЦА-нд шалгаж, Эрүүгийн хуулийн 13.2-2.3, 13.4-4.1, 13.6-2, 17.2-3.3 дахь заалтын дагуу эрүүгийн хэрэг үүсгэж, яллагдагчаар татан мөрдөн шалгах ажиллагаа явуулан, хэргийг шүүхэд шилжүүлэх саналаа илэрхийлж прокурорын хяналтад хүргүүлсэн” хэмээн мэдээлсэн.
Өөрөөр хэлбэл, Ц.Батаад халдсан хүмүүсийг хүн хулгайлах, хүчээр алга болгох, бусдын орон байранд хууль бусаар нэвтрэх, заналхийлэх гэсэн зүйл заалтын дагуу яллагдагчаар татаж шалгасан аж.
Эл хэргийг “Сэлэнгийн” хэмээх нэрээр нь зарим хүн мэддэг, өмнө нь нэг бус удаа эрүүгийн хэрэгт холбогдон, ял шийтгүүлж байсан У.Баатаржав зохион байгуулж, Н.Наранбаатар, М.Отгонсүх нартай хамтран гэрт нь орж, биед нь халдаж, барьцаалан “Ланд круйзер” машинд нь суулган авч явж Сүхбаатар дүүргийн нутаг дахь “Хүннү палас” зочид буудлын нэгэн өрөөнд цөөнгүй хоног хорьсон гэх мэдээлэл байна. Улмаар 98.5 сая төгрөгийг нь дээрэмдсэн аж. Хохирогч эл хэргийг хэн нэгний захиалгаар үйлдсэн хэмээн гомдол гаргаж, УЕПГ-т хүргүүлсэн ч мөрдөн шалгах ажиллагаагаар энэ нь тогтоогдоогүй юм байна.
Цагдаагийнхан У.Баатаржавыг эл хэрэгт холбогдуулан шалгаж гэрт нь нэгжлэг хийгээд их хэмжээний хуурамч ам.доллар хадгалж байсныг хураан авчээ. Тиймээс У.Баатаржавыг дээр дурдсан зүйл заалтаас гадна Эрүүгийн хуулийн 18.7-гийн “Мөнгөн тэмдэгт үнэт цаас, төлбөр тооцооны хэрэгсэл хуурамчаар бэлтгэж ашигласан”, 20.4-ийн “Галт зэвсэг, галт хэрэгсэл, тэсэрч дэлбэрэх бодис хууль бусаар эзэмшсэн” гэх үндэслэлээр яллагдагчаар тооцсон юм.
Бид энэ хэргийн талаар эргэж мэдээлсээр байх болно.
