Боловсролын сайд П.Наранбаяр 2024.09.16-ны өдөр багшлах эрхийн гэрчилгээ олгох, гэрээт багшийн талаар мэдээлэл хийсэн. Энэ үеэр Үнэн ба зөв намын дарга А.Отгонбаатар Боловсролын сайд П.Наранбаяр руу өндөг шидэж танхайрсан. Тэгвэл уг үйлдлийг цагдаагийн байгууллагаас шалгаж дуусаад, хэргийг шүүхэд шилжүүлсэн байна.
Тодруулбал, “Үнэн ба зөв” намын гишүүн А.Отгонбаатарт Зөрчлийн тухайн хуулийн 5.2 дугаар зүйлд зааснаар 7-30 хоног баривчлах шийтгэл оногдуулах саналтайгаар хэргийг шүүхэд шилжүүлэхээр болжээ.
Зөрчлийн тухай хуулийн 5.2 дугаар зүйл. Олон нийтийн газарт зүй бусаар биеэ авч явах, танхайрах
1.Олон нийтийн газарт, эсхүл орон байранд:
1.1.хэрүүл маргаан үүсгэж;
1.2.бусдыг өдөөн хатгаж;
1.3.бусдын амгалан тайван байдал алдагдуулж;
1.4.олон нийтийг үл хүндэтгэж;
1.5.Үйлчилгээний болон дарааллын журам зөрчиж биеэ авч явах нийтээр хүлээн зөвшөөрөгдсөн хэм хэмжээг зөрчсөн, эсхүл аж ахуйн нэгж, байгууллагын хэвийн үйл ажиллагааг алдагдуулсан бол хүнийг 100 мянган төгрөгөөр торгох, эсхүл албадан сургалтад хамруулж 7-30 хоногийн хугацаагаар баривчлах шийтгэл оногдуулна гэж заасан бөгөөд хэргийг шүүхээс хэрхэн шийдсэн талаар бид эргэж мэдээлэх болно.
