Монгол Улсын Батлан хамгаалах яам, АНУ-ын Дайны яам хоорондын ээлжит зөвлөлдөх уулзалтыг 2025 оны 09 дүгээр сарын 19-ний өдөр Улаанбаатар хотноо амжилттай зохион байгууллаа.
◽️Зөвлөлдөх уулзалтыг Монголын талаас Батлан хамгаалах яамны Төрийн нарийн бичгийн дарга, хошууч генерал Д.Ганхуяг, Америкийн талаас АНУ-ын Дайны яамны БНХАУ, Тайван, Монгол Улсыг хариуцсан Туслах төрийн нарийн бичгийн даргын орлогч Алваро Смит нар хамтран даргалж, албаны бусад төлөөлөгчид оролцов. Талууд хоёр талын батлан хамгаалахын харилцаа, хамтын ажиллагааны асуудлуудаар ярилцаж, олон улсын болон бүс нутгийн аюулгүй байдлын талаар санал солилцов.
Зөвлөлдөх уулзалтаар өнгөрсөн хугацаанд хамтын ажиллагааны хүрээнд явагдсан ажил, арга хэмжээний биелэлтийг дүгнэж, цаашид хоёр улсын батлан хамгаалах салбарын хамтын ажиллагааг өргөжүүлэн бэхжүүлэх, бие бүрэлдэхүүний цэргийн хэргийн мэдлэг боловсрол, ур чадварыг нэмэгдүүлэх, хамтарсан сургалт гэсэн гол чиглэлүүдээр хэлэлцэн саналуудаа нэгтгэж, хурал удирдагч нар нэгдсэн протоколд гарын үсэг зурлаа.
