Эрдэнэс Таван Толгой компанийн ногдол ашгийн асуудлаар иргэн О.Мөнхжин байр сууриа илэрхийллээ.
Тэрбээр “Би хувьдаа мөнгө тараахад дуртай хүн биш. Гэхдээ иргэн бүр үнэхээр Эрдэнэс Таван Толгойн хувьцааг эзэмшдэг бол, компани ашигтай ажиллаж ногдол ашиг тараах шийдвэр гаргасан бол хуулийн дагуу хувьцаа эзэмшигчид хүртэх ёстой” хэмээн онцолсон юм.
Түүний хэлснээр, тухайн компанийн 200 тэрбум төгрөгийн ашгийг ногдол ашиг хэлбэрээр тараахгүй гэж шийдвэл, уг хөрөнгийг хэрхэн, хааш нь зарцуулахыг компанийн өөрийн удирдлага шийдэх эрхтэй аж.
Мөн “Засгийн газарт ногдол ашиг өгөөд, иргэдэд өгөхгүй байх боломжгүй. Нэг талын хувьцаа эзэмшигчдээ өгч, нөгөө талд нь өгөхгүй байна гэдэг байж болохгүй зүйл” хэмээн ялгаж салгаж ойлгохыг уриаллаа.
Тэрбээр цааш нь, хэрэв экспортын орлогоос бодит ашиг олсон бол түүнийг ногдол ашиг хэлбэрээр хуваарилах нь мөнгө хэвлэж тараахаас огт өөр ойлголт гэдгийг тодотгосон юм. “Төвлөрсөн, орж ирсэн мөнгийг хуваарилж байгаа хэрэг. Энэ нь харин ч эдийн засгийн мөнгөний урсгалыг нэмэгдүүлж, эерэг нөлөө үзүүлнэ” гэжээ.
