Хар тамхитай тэмцэх албанаас санаачлан мансууруулах эм, сэтгэцэд нөлөөт бодисын хор уршгийг кино урлагаар дамжуулан иргэд, олон нийтэд таниулах, соён гэгээрүүлэх зорилготой “NO DRUG – Ганц удаа гэж үгүй” нэртэй 10 ангит уран сайхны киног бүтээж, үзэгчдийн хүртээл болголоо.
Тус киног А-Артис Пикчирс болон Мобинет компанитай хамтран бүтээсэн бөгөөд хар тамхи, мансууруулах бодисын аюул, хор уршгийг олон нийтэд ойлгуулж, урьдчилан сэргийлэх ач холбогдолтой бүтээл болсон гэдгийг зохион байгуулагчид онцолж байна. Кино нь ялангуяа залуучууд, өсвөр үеийнхэнд хар тамхи, сэтгэцэд нөлөөт бодисын хор хөнөөлийг бодит түүх, уран сайхны өгүүлэмжээр хүргэхийг зорьжээ.
Киноны нээлтийн үеэр нийгмийн аюулгүй байдал, хууль сахиулах байгууллагын үйл ажиллагааг дэмжих, хар тамхитай тэмцэх чиглэлд оруулсан хувь нэмрийг нь үнэлж С.Ариунбямбыг “Цагдаагийн төлөө” хүндэт тэмдгээр шагнасан байна.
Энэхүү уран бүтээл нь хар тамхины хэрэглээний хор уршгийг олон нийтэд таниулах, залуусыг энэ төрлийн гэмт хэрэг, эрсдэлээс урьдчилан сэргийлэхэд чухал ач холбогдолтой гэж үзэж байгаа юм.
