С.Сэрчмаагийн COME BACK шүүмжлэл дагуулж эхэллээ

МН25-р суваг телевиз С.Сэрчмаатай эргэн хамтран ажиллахаар болжээ. Энэ тухайгаа дуучин бүсгүй өөрийн цахим хуудаснаа дуулгаж, “Nyambaa&Sally’s home” нэвтрүүлгийг дахин гарах болсныг зарлажээ.

Энэ удаагийн дугаарт, жүжигчин Төөтөө, загвар өмсөгч Номуунаа нар оролцох юм байна.

Хэл аманд орооцолдоод сар ч хүрээгүй байхад эргэн ирж буйд үзэгчид дургүйцлээ илэрхийлжээ.

Тухайлбал, “ийм хурдан уу. Монголд арай л хурдан гэмшиж ухаарах юм. Ингэх хэрэг байна уу, Танд дургүй биш л дээ. Гэхдээ олны танил хүн үлгэр жишээч байх ёстой”. “Ямар ч өгөөжгүй нэвтрүүлэг”, “Олны танил хүн байж ядаж 6 сар чимээгүй амьдарч болдоггүй юм уу, бүдүүлэг юм аа” гэх мэтчилэн сэтгэгдэлүүд хөвөрсөөр байна.
Болсон явдлыг эргэн сануулахад, Энэ сарын 10-нд “Никитон” хамтлагийн дуучин Б.Батчулуун буюу Баачка, дуучин С.Сэрчмаа нарын сошиалд тавьсан бичлэг нь цахим хэрэглэгчдийн дунд ихээхэн бухимдал, эсэргүүцэл, маргаан дэгдээгээд байгаа билээ. Зүй бус сэдэвтэй тэдний харилцан ярианы бичлэгийг иргэд бэлгийн хүчирхийллийг өөгшүүлж, байж боломгүй үлгэр дууриалал үзүүлсэн хэмээн шүүмжилсэн бол хуульчид “Хүний бэлгийн эрх чөлөө, халдашгүй байдлын эсрэг гэмт хэрэг” байх магадлалтай тул прокурорын шалгалт хийх үндэслэлтэй гэж үзжээ.
Иймд цахим хэрэглэгчид, инфлүэнсэрүүд Б.Батчулуун, С.Сэрчмаа нарыг уучлал гуйж, хэлсэн үгэндээ хариуцлага хүлээхийг шаардахын зэрэгцээ иргэдэд дээрх хоёр уран бүтээлчийн дууг сонсохгүй байх, байгууллагуудад тэдэнтэй хийсэн гэрээгээ цуцлахыг уриалсаар байгаа юм.

Мөн “25 дугаар суваг” телевиз дуучин Сэрчмаатай цаашид хамтран ажиллахгүй болсноо мэдэгдэж, “Манай телевизтэй хамтран ажиллаж, “Nyambaa&Sally’s home” нэвтрүүлгийг бэлтгэн гаргаж байсан дуучин С.Сэрчмаа өөрийн фэйсбүүкээр цахим орчинд ёс зүйгүй үйлдэл гаргасанд гүнээ харамсаж, үзэгчид та бүхнээсээ уучлал хүсье!

Цаашид манай телевиз “Nyambaa&Sally’s home” нэвтрүүлгийг эфирт гаргахгүй болсныг мэдэгдье!” гэсэн байдаг.
Түүнчлэн “Капитрон Банк”-ны маркетингийн захирал Э.Учрал дуучин Батчулуунтай хамтран ажиллах гэрээгээ цуцалж хамтын ажиллагаагаа дуусгавар болгож байгаагаа сошиал хаягаараа дамжуулан мэдэгдсэн билээ.