“Авъяаслаг монголчууд”, “Voice of Mongolia” зэрэг шоуны хөтлөгчөөр ажиллаж байсан жүжигчин найруулагч О.Анхбаяр өдгөө MCS-ын хүргэн болсон.
Удам дамжсан урлагийн гентэй тэрээр 30 нас хүртлээ дураараа дургиж, дунд чөмгөөрөө жиргэж олсон мөнгөөрөө өөрийгөө мөлчийтөл гоёдог байсан гэхэд хилсдэхгүй.
Өөрөөр хэлбэл, санхүүгээ тэр чигт нь брэндэд өгчихдөг сахилгагүй, гялгар ганган гэж жигтэйхэн залуу байв. Ямар сайндаа л, найзууд нь түүнийг “Эрээн даавууны шуналт” гэж байхав.
Харин гэр бүлтэй болсноос хойш намба суужээ. А.Дөлгөөн гэх даруухан үзэсгэлэнтэй бүсгүйтэй гэр бүл болсноос хойш баруунаараа олоод зүүнээрээ урсгадаг байсан мөнгөө “тогтоож” сурчээ.
Өдгөө хоёр хүүхдийн аав болсон учраас нас намба ч суугаа биз. Гэхдээ үрэлгэн занг нь дарсан ухаант бүсгүй бол түүний эхнэр А.Дөлгөөн.
Хэдхэн сарын өмнө “Эх орон” телевизийг МУГЖ дуучин Т.Баясгалангаас худалдан авсан тэрээр өдгөө “Central” телевиз болгон өөрчилсөн. Шинэ телевиз байгуулагдсан даруйдаа үзэгчдээс “коко” үнэлгээ аваад буй. Энэ бүх амжилтийн цаана түүний ухаалаг, даруухан гэргий бий.
