Үндэсний томоохон үйлдвэрлэгчид болох “Газар шим”, “Vidan”, “Bagro” зэрэг компанийн боловсруулан гаргадаг “Зөгийн бал” бүтээгдэхүүнд ШӨХТГ-аас хяналт тавьж тавихаа мэдэгдлээ.
Энэ талаар тус газрын дарга Б.Бат-Эрдэнэ өөрийн цахим хуудаснаа “Хиймэл орцтой үйлдвэрийн аргаар гаргаж авсан бүтээгдэхүүнийг “ЗӨГИЙН БАЛ” гэж нэрлэн худалдаалсан нь хэрэглэгчийг төөрөгдүүлж үйлдвэрлэгчийн үүргээ хэрэгжүүлээгүй тул 5 000 000 (Таван сая) төгрөгөөр торгон лангуунаас тус барааг татуулж, хугацаатай үүрэг даалгавар өгсөн” гэжээ.
Дээр дурьдсан компаниудын үйлдвэрлэн гаргадаг бүтээгдэхүүний орц найрлаганд зөгийн бал огт ороогүй бөгөөд ХИЙМЭЛ ҮЙЛДВЭРИЙН АРГААР БОЛОВСРУУЛСАН ЧИХРИЙН СИРОП байсан гэнэ. Зөвхөн талх, нарийн боовны десерт маягаар хэрэглэж болох аж.
Энэ талаар сошиал сүлжээнд өөрийн гэсэн уншигчидтай болсон Цахим эмч анх олон нийтэд мэдээлж “ХЭРЭГЛЭГЧДИЙГ ТӨӨРӨГДҮҮЛЭХЭЭ БОЛЬ. ҮНДЭСНИЙ ҮЙЛДВЭРЛЭГЧИД ЭЭ! Нүүр хэсэгтээ томоор “ЗӨГИЙН БАЛ” гээд биччихнэ. Харин хүн анзаарахааргүй ар хэсэгтээ жижгээр зөгийн балны орц найрлагагүйг бичнэ. Хэрэглэгчид зөгийн бал гэж бодоод худалдан авалт хийнэ. Энэ бол хэрэглэгчдийг төөрөгдүүлсэн үйлдэл гэж харж байна” хэмээн шүгэл үлээсэн юм.
Жинхэнэ зөгийн балыг хэрхэн таних вэ?
Жинхэнэ балыг амандаа байлгаад залгихад хоолой дээр хорсох маягийн мэдрэмж төрдөг. Халбагаар аваад гоожуулахад сүүлийн дусал нь халбаганаас урсахгүй, пүрш маягийн хөдөлгөөн хийгээд буцаад халбагандаа тогтдог. Халбаганаас гоожуулангаа халбагаа хурдан эргүүлэхэд ороогдоод ирдэг. Хуруугаараа имрэхэд арьсанд бүрэн шингэнэ, бөөрөнхийлөгдөж үлдэх юм байдаггүй.
Зуны дөнгөж хураасан балыг дээрх аргуудаар таних хэрэгтэй. Харин 11 дүгээр сараас хойш жинхэнэ балыг танихад амархан болоод ирдэг. Зөгийн бал байгалийнхаа хуулиар 11 дүгээр сар гэхэд өтгөрч талстажсан байх ёстой. Хэрэв өдийд шингэн зөгийн балыг “ориг” гэж танд үнэмшүүлэх гэж байгаа бол битгий итгээрэй. Зарим хүмүүс өтгөрсөн балыг хараад хуурамч гэж боддог. Ингэж боддог хүн маш олон байдаг болохоор худалдаалагчид жинхэнэ балыг кристаллжихаар нь халааж шингэн байдалд нь оруулсан байж ч болох л доо. Халаасан бал хэзээ ч буцаж талстат болдоггүй. Гэхдээ ингэж халаасан баланд эмчилгээний увидастай бодис байхгүй болсон байдаг. Зөгийн балны гайхамшигт увидасыг бүрдүүлж байдаг биологийн идэвхит бодиснууд 40 градусаас өндөр температурыг тэсч чаддаггүй, үхэх нь үхээд, задрах нь задраад алга болдог болохоор халааж шингэлсэн бал амтнаас цаашгүй болдог. Тийм болохоор бал хураадаг сезон өнгөрөөд 3 сар болсон тохиолдолд өтгөрсөн бал авбал алдахгүй. Харин авсан хойноо, шингэн баланд дуртай бол та өөрөө, балныхаа ашигтай шинж чанарыг нь алдагдуулахгүйгээр шингэлж болно. Үүний тулд шилтэй балаа 40 градусын усанд тавих хэрэгтэй. Олон цаг болж байж хайлна. Байн байн хөрсөн усыг асгаж, шинэ ус хийнэ.
Элэг цөс ходоодны өвчинд түлхүү хэрэглэхийг хүсвэл цайвар өнгийн бал байвал зүгээр.Харин рапс цэцэгний бал тархины цусан хангамж сайжруулж ой тогтоолтыг дэмжинэ.Гурвалжин будааны бал нь зүрх судас,цус багадалттай хүмүүст тохиромжтой байдаг ба хамгийн их тэжээллэг байдаг.
Ихэнхдээ зөгийн балтай ус уухдаа хав халуун усанд хутгаж, хамаг чухал бодисыг нь “алаад” байдаг. Ердөө л 40 градус усанд найруулахад тохиромжтой.
