Өглөө эрт босч ажлаа амжуулдаг хүмүүст амжилт ирдэг. Тэдний жишээг монголын олны танил хүмүүсээр тодотгож байна.
Загвар өмсөгч Ж.Энэрэл
Зураг авалт ихэвчлэн 8 цагаас эхэлдэг. Өглөө 6:00 гэж босоод нэг цаг дасгал, иог хийгээд, хүйтэн шүршүүрт ороод ажилдаа гарна. Очоод нүүр будалт, үс заслаа хийлгээд зураг авалтдаа орно доо. Зураг авалт 17-18 цаг хүртэл үргэлжилдэг. Ихэнхдээ өөр өөр хотод зураг авхуулдаг болохоор тарангуутаа онгоцны буудал яваад, өөр хотод очиж унтаж амраад маргааш нь 6-с эхэлдэг ч юм уу. Хуваарь ерөнхийдөө нэг иймэрхүү, нэлээн шахуу. Харин Берлинд байж таарах үедээ ажлын дараа гэртээ хоол хийж идэх ч юм уу, зурах гэх мэтээр дуртай зүйлсээ хийж, биеэ амраадаг.
“MCS” группийн дэд ерөнхийлөгч Д.Энхтүвшин
Өглөөний 06 цагт босдог. Бүтээмжтэй холбоотой санаануудаасаа хуваалцья. Өөрийн хамгийн бүтээмжтэй байдаг өглөөний цагуудад чухал ажлаа амжуулахыг хичээдэг. Хэрвээ гацаад явж өгөхгүй бол өөрийгөө нэг их хүчилдэггүй, орхичхоод дараа нь боломжтой үедээ үргэлжлүүлдэг. Анхаарлаа ихээхэн төвлөрүүлэх ёстой ажилд олон цаг зарцуулсны дараа ямар ч бүтээмжгүй болчихдог. Тиймээс хүнд, хөнгөн ажлуудаа ээлжилж хийвэл зүгээр санагддаг юм. Энэ аргыг “Помодоро техник” гэдэг. 30-45 минут хүнд, хэцүү ажил хийгээд, дараа нь 10-15 минут хөнгөн ажил гэх мэтээр ээлжлээд явахад илүү бүтээмжтэй байдаг.
“Киви” хамтлагийн дуучин Ука
Аль болох эрт босчиход хүссэн зүйлсээ амжуулчихдаг шүү. Тоглолтын үеэр бол цаг бүр ч сайн баримтална. Дотор Укагаа сонсоод, зарим өдөр гараас юм гарахааргүй санагдвал заавал өөрийгөө хүчлэхгүйгээр ар гэрийн ч юм уу, бусад ажлаа амжуулдаг. Тийм үед оффис дээрээ очвол цагийг хий үрсэн болчих гээд байдаг.
ЕрөнхийлөгчХ.Баттулгын хүргэн О.Тэнүүн
Өглөө 6:30-д босоод 8:30 гэхэд ажилдаа ирсэн байдаг. Бүх ажлаа аль болох эрт шахаж, эрт дуусгахыг эрмэлздэг. Өглөөнөөс үдийн цай хүртэл чухал уулзалтуудаа товлож, үдээс хойш байгууллагын дотоод ажилд түлхүү төвлөрдөг. Орой фитнессдээ явж, заримдаа сагс тоглоно. Унтчихаар “юмнаас хоцроод” байгаа юм шиг санагддаг болохоор шөнө 12 цагийн үед унтдаг даа.
Комедиан Төөгөө
Өглөө 7-8 цагт босдог. Ихэнх уулзалтыг үдээс өмнө товлож, зураг авалтуудыг түүнээс хойш тавьдаг. Зураг авалтын цаг тохирно гэдэг олон хүнээс хамааралтай учраас маш сайн төлөвлөхгүй бол цагаасаа хоцрох, хойшлох зэрэг гэнэтийн зүйлс гарна. Уулзалтгүй үедээ өглөө 9 цагт оффис дээрээ ирж ажилладаг. Ингээд үдээс хойшдоо зураг авалтдаа гардаг даа. Орой хоёр хүүхдээ цэцэрлэгээс нь авч, гэртээ хоол идчихээд оройн тоглолтдоо явна. Заримдаа арга хэмжээнүүд хөтлөх, stand-up хийх зэрэг ажлууд гарч ирдэг юм. Хэрэв хөтлөгч хийсэн бол 12-1 цагийн үед гэртээ ирдэг. Шинэ жил дөхсөн арванхоёрдугаар сар бол хамгийн ачаалалтай үе. Өдөрт хэдхэн цагийн нойртой, хоёр, гурван газарт очиж тоглох үе ч байна.
УИХ-ын гишүүн Г.Амартүвшин
Өглөөний 6 цаг 30 минуттай зэрэгцэж босдог. Лондонд байхаас хойш өдрөө мэдээлэл авч эхлүүлдэг дадалтай болсон. 7-8 монгол сонин, онлайнаар The Financial Times, Wall Street Journal-аа эргүүлж тойруулж хараад өдрийн ажилдаа ордог. Уулзалтуудаа гол төлөв 10 цагаас эхлүүлж, 14 цаг хүртэл шахаад дуусгахыг хичээдэг. Үдээс хойш имэйл, бичиж төвлөрөх ажлаа хийнэ. Өглөөний ундаа сайн уугаад өдрийн хоолыг алгасаж, оройн хоолоо эрт идэж заншсан. Ингээд оройн хоолноос хойш ар гэр, бусад зүйлсдээ цаг зарцуулахыг боддог юм. Заримдаа өглөө, заримдаа 16-17 цагийн үед дугуйн бэлтгэл хийдэг. Дулааны улиралд бол гадуур, бусад улиралд гэртээ дугуй унадаг.
