Их мөнгийг том улстөрчид л иддэг, тэд идэж л байх ёстой юм шиг ойлгож, үл тоомсорлож ирсэн монголчуудын нүдийг нээж, чихийг онгойлгосон зүйл бол мэдээж, ЖДҮ. Харин ЖДҮ-гийн дуулианы хүчээр тэрбумаар нь ичих нүүргүй халаасалж байсан улс төрчдийн багийг хуулж, бас тэр багийг олон жилийн турш өмсөж явсан нам намын төлөөлөл нэр хүндтэй улс төрчид, тэдгээр улс төрчидтэй сүлбэлдсэн бизнесийн бүлэглэлийг хайр найргүй илчилсэн энэ цаг үед сэтгүүлч миний бие Үнэ тогтворжуулах хөтөлбөрийн “араас явав”.
Ингэж явсаар энэ олон жилийн турш чиг чимээгүй “мартагдсан” байгаа 43 компанийг илрүүлсэн юм. Харин энэхүү 43 компаний магнайд толгойдоо шороогүй давхиж байгаа Таван богд группийн захирал Цагаачийн Баатарсайхан гэгч эрхэм өөрийн эрхгүй анхаарал татав. Учир нь Үнэ тогтворжуулах 3 их наядын 40 тэрбумыг нь энэ хүний хамаарал бүхий 3 компани хувааж авсан явдал юм.
Үнэ тогтворжуулах хөтөлбөрийн хүрээнд таван дэд хөтөлбөр хэрэгжүүлж, 3 их наядын зарцуулсан байдаг. Харин энэхүү таван дэд хөтөлбөрийн нэг Гурилын үнэ тогторжуулах хөтөлбөрт Цагаачийн Баатарсайхан гэгч энэ эрхэмийн хамаарал бүхий Од групп ХХК 16.318.000.000 \16 тэрбум 318 сая\, Улаан Од ХХК 200.000.000 \хоёр зуун сая\, Улаанбаатар гурил ХХК 24.000.000.000 \24 тэрбум\гэсэн гурван компани нийтдээ 40.518.000.000 \40 тэрбум, 518 сая\, төгрөгийн санхүүжилт авсан байна.
Харин доорх зурагт эдгээр компаниуд ямар хамаарлаар Цагаачийн Баатарсайхан гэгч энэ хүний хамааралтай болохыг нотолж байгаа юм. Иргэний бүртгэл мэдээллийн санд албан ёсоор байршсан мэдээллээр эдгээр компаниуд хэдийгээр өөр нэр, өөр эзэмшигч, захиралтайгаар уг зээлийн хөнгөлөлтөд хамрагдаж санхүүжилт авсан ч хамаарлын бүртгэлээрээ Таванбогд группийн захирал Цагаачийн Баатарсайхан гэгчийн бүрэн хамааралтай нь харагдаж байгаа юм.
Дашрамд дурдахад, Төрийн ордоны зүүн талд сүндэрлэн боссон том шилэн барилгын эзэмшигч мөн л Таванбогд группийн захирал Цагаачийн Баатарсайхан юм. Тэрбээр, 23.850.000 000 /23 тэрбум 850 сая/ төгрөгийг бүрэн төлж,Сүхбаатар дүүргийн наймдугаар дугаар хорооны нутаг дэвсгэрт байрлах “Улаанбаатар” сонины хуучин хэвлэх үйлдвэрийн барилгыг газрынх нь хамт өмчлөх эрхээ авч байсан юм.
