Дэлхийн 180 гаруй улс жил бүрийн 11 дүгээр сарын 25-наас 12 дугаар сарын 10-ны өдрүүдэд “Жендэрт суурилсан хүчирхийлэлтэй тэмцэх 16 хоногийн аян”-ыг нэгдмэл зорилго, уриан дор тэмдэглэн өнгөрүүлдэг билээ.
Монгол Улс тус аяныг төр, төрийн бус байгууллага, олон улсын байгууллагуудтай хамтран 20 дахь жилдээ тодорхой сэдвийн дор зохион байгуулж байна.
Энэ жилийн хувьд жендэрт суурилсан хүчирхийллээс урьдчилан сэргийлэхэд хувь хүн бүрийн оролцоо, харилцаа, хандлага үйлдэл бүр чухал тул “Эерэг бол гоё. Харилцаа, хандлага, үйлдэл” гэсэн уриан дор энэхүү аяныг тэмдэглэн өнгөрүүлэхээр төлөвлөсөн бөгөөд энэхүү аяны зорилго нь хөвгүүд, эрчүүдийн оролцоог хангах замаар охид, эмэгтэйчүүдийн эсрэг үйлдэгдэж буй аливаа хүчирхийллийн эсрэг хөдөлгөөнд нэгдэж, хэзээ ч “хүчирхийлэл үйлдэхгүй, хүчирхийллийн хажуугаар чимээгүй өнгөрөхгүй” байхад оршдог байна.
Жендэрт суурилсан ХҮЧИРХИЙЛЭЛТЭЙ ТЭМЦЭХ 16 хоногийн АЯН зохион байгуулагдана Arslan.mn
2017 онд тус аяныг анх удаа төрийн байгууллагуудыг өргөнөөр хамруулан зохион байгуулсан бөгөөд аянд Ерөнхийлөгчийн Тамгын газар, Улсын Их Хурлын Тамгын газар, Засгийн Газрын Хэрэг эрхлэх газар, яамд /13/, нийслэл, дүүрэг /9/-ийн ЗДТГ зэрэг 30 орчим байгууллагын 2300 гаруй төрийн албан хаагчид, байгууллага, хамт олноороо “Цагаан тууз” зүүж, жендэрт суурилсан хүчирхийлэлтэй тэмцэхэд олон нийтийг уриалах санаачилгыг байгууллагын цахим хуудас болон олон нийтийн хэвлэл мэдээллийн хэрэгслээр сурталчлан ажиллажээ.
МАНАЙ УЛСЫН ХЭМЖЭЭНД ЭНЭ ОНЫ ЭХНИЙ АРВАН САРЫН БАЙДЛААР:
Нийт 31,525 гэмт хэрэг бүртгэгдсэн бол үүний 866 нь гэр бүлийн хүчирхийллийн гэмт хэрэг байна,
Энэ тоо нь нийт гэмт хэргийн 2.7 хувийг эзэлж байна,
Гэр бүлийн хүчирхийллийн гэмт хэргийн 55 хувь нь Улаанбаатар хотод, үлдсэн 45 хувь нь хөдөө орон нутагт үйлдэгдэж байна,
Эдгээр үйлдэгдэж буй гэмт хэргийн 87 хувь нь гэр, орон сууцанд буюу цоожтой хаалганы цаана үйлдэгдэж байна,
Гэмт хэргийн хохирогч болсон 28,300 иргэн байгаагийн 597 иргэн гэр бүлийн хүчирхийлийн улмаас хохирогч болсон,
Мөн гэр бүлийн хүчирхийллийн улмаас зөрчил гаргасан нийт 2,890 иргэнийг баривчлан шийтгэсэн талаар ЦЕГ-ын Урьдчилан сэргийлэх хэлтсийн ахлах мэргэжилтэн, Цагдаагийн дэд хурандаа Б.Цэнгэлбаяр мэдээлсэн юм.
Жендэрт суурилсан ХҮЧИРХИЙЛЭЛТЭЙ ТЭМЦЭХ 16 хоногийн АЯН зохион байгуулагдана Arslan.mn
Энэ жилийн аян 21 аймаг, нийслэл, 9 дүүргийн Засаг даргын тамгын газар, нутгийн захиргааны байгууллагуудыг өргөнөөр татан оролцуулж байгаагийн зэрэгцээ олон нийт рүү чиглэсэн мэдээлэл сурталчилгаа, контентуудыг үйлдвэрлэж, түгээж байгаагаараа онцлог болж байна. Тус аяныг тэмдэглэн өнгөрүүлэхийн хүрээнд ирэх сарын тавны өдөр “Цагаан туузтаны хөдөлгөөн” зохион байгуулагдах бөгөөд тус хөдөлгөөнд төрийн 100 орчим байгууллагыг нэгтгэж, байгууллагын ажилтан, албан хаагчдад жендэрт суурилсан хүчирхийллийн эсрэг аяны мэдээллийг хүргэхээр төлөвлөөд буй талаар мөн мэдээллээ.
