“Орегон-2022” Хөнгөн атлетикийн ДАШТ-ий марафон гүйлтийн эрэгтэйчүүдийн төрөлд Монголын 3 тамирчин оролцож, гавьяат тамирчин Б.Сэр-Од 2:11:39 амжилтаар 26 дугаар байр, ОУХМ Ц.Бямбажав 2:14:44 амжилтаар 42 дугаар байрт тус тус оржээ.
Харин ОУХМ Д.Гантулга 30 гаруй км туулсны дараа замаас гарч, барианд орж чадсангүй. Цаг агаар үүлэрхэг , харьцангуй сэрүүвтэр, цельсийн 16 градус дулаан, 79 хувийн чийгшилтэй байсан ч 33 орны 63 тамирчин гараанаас гарч 54 нь барианд орлоо.
Өнөөдрийн марафоны цагийн хувьд их өндөр буюу богино хугацаа зарцуулсан гэдгийг тамирчдын барианд орсон цаг харуулсан байна. Олимп, дэлхий, томоохон марафонд 2 цаг 10 минут дотор гүйхэд эхний 10-т бараг л ороод ирдэг. Гэтэл энэ удаа 2 цаг 10 минут гүйсэн хүн, арай гэж эхний 20-д багтаж байжээ.
