“Охин минь битгий уйл”, “Би эр хүнд хайртай”, “Үл таних эмэгтэй”, “Хайр” жүжгийн дуу зэрэг олон арван дууны шүлэг, “Би чамд хайртай-2”, “Нарны өнгө”, “Хамтран амьдрагч”, “Ми-15” зэрэг кино зохиол, “Хишигт”, “Хорин жилийн дараа”, “Муу залуу” зэрэг тууж, “Болор туужууд”, “Диваажингийн хоригдол”, “Нүцгэн шөнө”, “Зүрхэнд үйлдвэрлэв”, “Би бид хоёр” зэрэг номын зохиолч, Монголын Зохиолчдын Эвлэлийн болон Утга зохиолын оны шилдэг бүтээл шалгаруулах “Алтан-Өд” наадмын хошой тэргүүн шагналт, зохиолч Х.Болор-Эрдэнийг мэдэхгүй хүн ховор.
Гурван жилийн тэртээ “Гүйж яваа эмэгтэй” туужаараа олныг хуйлруулж явсан тэрбээр өөрийн цахим хуудаснаа урлагийнхныг шүүмжлэв.
Тэрбээр “Монгол жүжигчид, дуучид маань нүүрнийхээ будгийг хэтрүүлээд байна аа. Ялангуяа зохиолын дуучид. Илт арзайсан хиймэл сормуус, нүүрийг гэрэлтүүлэхээсээ илүүтэй халтартуулсан тод будалт, тос нь урссан мэт гялгар крем, монгол хүнд барагтай зохидоггүй хүнд өнгийн тень, шулмын улаан уруул, буруу сүүдэрнүүд. Хөөрхөн харагдах нь тод харагдахаас арай өөр ойлголт.
Охид ялангуяа хөөрхөн болох гэж давхарласаар байгаад хөгшин харагдаад байх юм. Аль 90-ээд онд л дэлгэрч байсан энэ айдас хүрэм будалтууддаа хичнээн их мөнгө зарж байгаа бол? Амьтан хүн айлгаж цочоохоо болиорой” гэжээ.
Зохиолч бүсгүйн хувьд энэ жил 47 насыг зооглож буй. Тэрбээр гэр бүлийн хамт Франц улсад ажиллаж амьдардаг.
