Хошин урлагийн салбарт өөрийн түүхээ бүтээж яваа уран бүтээлч бол МУГЖ Л.Баттулга буюу Аглуу. Г.Луушаан гэх овогтой тэрбээр өөрийгөө “Хятад хүн биш” хэмээн тодорхойлдог. 
Түүний аав Улаанбаатар хотын унаган иргэн, энд төрж өссөн нэгэн бол, ээж Хэнтий аймгийн Биндэр сумынх гэнэ лээ. Эцэг эхээс дөрвүүлээ тэрбээр өөрийн цахим хуудаснаа ганц охин дүүгээрээ гангарчээ.
Жүжигчин Л.Баттулгын хувьд хэвлэлд өгсөн нэгэн ярилцлагандаа “Манайд ааваас минь үлдсэн дөрвөн мөнгөн хундага байдаг юм. Аавыг минь төрөхөд өвөг эцэг маань хүүдээ зориулж ойн хундаганууд хийлгэсэн юм билээ. Дээрээ “Г.Луушаан мэндлэв. Нэг ой хүрэв” гэсэн бичээстэй дөрвөн ой хүртэл нь цэвэр цалин цагаан мөнгөөр хийлгэсэн дээр доороо алхан хээтэй хундаганууд үе дамжин манайд үлдсэн байдаг юм. Манайх чинь эцэг эхээс дөрвүүлээ, бид дөрөвт нэг нэгээрээ үлдэх ёстой эд байхгүй юу. Би доороо нэг дүүтэй, дээрээ нэг ах нэг эгчтэй хүн. Бид боржигон овогтой их хааны удмын хүмүүс. Би хөх толботой төрсөн Монгол хүн. Миний эцэг өвгөд, аав ээж хоёр ч дээрээс харж байгаа байх” хэмээн ярьж байсан түүхтэй.
