Засгийн газраас өнгөрсөн долоон хоногт Уул уурхай, хүнд үйлдвэрийн сайд асан Г.Ёндонг “Эрдэнэт үйлдвэр” ТӨҮГ-ын даргаар томилох шийдвэр гаргасан.
Гэсэн ч шийдвэр одоог хүртэл албажаагүйгээс Г.Ёндон ажлаа хүлээж аваагүй байгаа юм.
Энэ тухай Засгийн газрын Хэрэг эрхлэх газрын дарга Д.Амарбаясгалан “Засгийн газрын зүгээс Төрийн өмчийн бодлого зохицуулалтын газарт чиглэл өгдөг. Тус газар хорооныхоо хурлыг хийх замаар ажлыг хүлээлцүүлэх процесс болно.
Өмнө нь томилогддог, ажил хүлээлцдэг үйл явц бүх түвшинд туйлын хариуцлагагүй явж ирсэн байдаг. Өөрөөр хэлбэл, төрийн бодлогын уялдаатай холбоотой зүйл бүх түвшинд хаягдаж ирсэн. Бид ажил хүлээлцэх үйл явцыг нэг өдөр, нэг цагийн хугацаанд хийгдэнэ гэж боддогоо өөрөөр харах ёстой.
Ялангуяа Эрдэнэт зэрэг томоохон үйлдвэр дээр ажил хүлээлцэх үйл ажиллагаанд 7-10 хоногийн хугацаа зарцуулах нь байх ёстой зүйл.
“Эрдэнэт үйлдвэр” дээр ажил хүлээлцэх үйл ажиллагаа эхэлсэн. Түүнээс өмнөх дарга нь ажлаа өгөхгүй гэж цааргалж байгаа зүйл огт байхгүй. Төр хаанаа хэнийг хэзээ яаж ажиллуулахаа шийдэж чаддаг байх ёстой” хэмээх тайлбарыг өгөв.
